tag:blogger.com,1999:blog-54572120564808647662011-04-21T15:05:11.086-07:00Abdelsalamhttp://www.blogger.com/profile/06809031281440463853noreply@blogger.comBlogger11100tag:blogger.com,1999:blog-5457212056480864766.post-37848658216239585052007-10-06T05:21:00.000-07:002007-10-08T04:08:33.953-07:00<strong>- الأستاذ يوسف حلمى ..!<br />أهلا عمى ..<br />لأ مش م البيت، أنا باتكلم م الشارع.<br />حلوه، على رأيك، ما هو بيتنا الشارع ..<br />كنت فى سهرة وراجع،<br />قلت اتكلم، واهو من حظى لقيتك،<br />مع ان – تصور ؟ -<br />وانا بانقل أرقام التليفون، من نوتة لنوتة،<br />جيت عندك، قام شىء ملعون قال: لأ ، ما خلاص ..<br />ومشيت سطرين<br />والتالت قلت: لا يمكن يوسف حلمى خلاص..<br />ورجعت كتبت الاسم، ما خلّصنيش،<br />شوف الاخلاص ..<br />كانت سهرة جميلة ..<br />ايوه .. الشله اياها .. تسلم وتعيش ..<br />كانت وحياة النبى عايزاك ..<br />غنينا يا سيدى حاجات سيد درويش ..<br />معلهش .. ما هو انت برضه كنت هناك ..<br />انت تمللى معانا، وحوالينا، وبيننا،<br />موت مين ده يابو حجاج اللى يخبيك منا؟!..<br />يعنى كان خبا الشيخ سيد؟.. ما هو زى الجن،<br />ولا لحظة بيهمد ولا بيوِّن<br />فى المسرح، فى المصنع، فى الغيط، فى المدرسة،<br />فى السجن<br />ده وتر مشدود يابا،<br />لمسوه من كام ألف سنة، ولساه بيزن،<br />وكلام بيرن ،<br />رنة طويلة طويلة، بتضحك وتئن،<br />من قلب ربابة النيل على قلبه على قلبك على قلبى<br />على قلب الشمس الشموسة اللى الليلة قعدت جنبى .<br />- أيوه. كان فينا الليلة جماعة جداد ..<br />انضمت فوجه جديده، بنات وولاد.<br />طبعاً .. زى المعتاد،<br />صاحيين .. صاحيين .. صاحيين .. صاحيين.<br />قلنا يا سيدى – فضلة خيرك – "ماتفوقوا يا<br />مصريين"<br />و "الحلوة دى قامت" ، و "السيّاس" ..<br />قلنا "بلادى بلادى" ..<br />تعرف؟ حسيت احساس ..<br />ان الشخص البلطجى ده اللى اسمه الموت<br />عاجز، قدام الناس ..<br />قلنا "يا هادى يا هادى".<br />البنت قالت لى: عرفت منين الغنوا دى؟..<br />قدمتك ليها، وسبتك واقف وياها ..<br />سبتك واقف بتكلمها، وتعلمها، وترعاها،<br />ما هو كله كلام …<br />أنا باتكلم م الشارع ،<br />والشارع فيه جامع،<br />والجامع مبنى بقى له ميات م الأعوام<br />انما شبابيكه كلام ، وبيبانه كلام ،<br />وعرايس أفريزه كلام ، وحيطانه …<br />والمعمارجى اللى بناه واقف قدامى، وبيكلمنى،<br />بيمد لى ايده، و بياخد كبريت منى،<br />بيولع، وبيضرب لى سلام …<br />يا سلام ..<br />موت مين ده يا يوسف حلمى اللى يحوشك عنى؟..<br />تصبح على خير.<br /></strong><br /><br />شد الحزام على وسطك غيره ما يفيدك<br />لابد عن يوم برده ويعدلها سيدك<br />إن كان شيل الحمول على ظهرك يكيدك<br />أهون عليك ياحر من مَدّة إيدك<br /><br />ما تيالله بينا انت وياه ونستعان ع الشقا بالله<br />واهو اللى فيه القسمه جبناه واللى ما فيش انشالله ما جا<br />مادام بتلقى عيش وغموس يهمك ايه تفضل موحوس<br />ما تحط راسك بين الروس لا تقوللي لا خيار ولا فقوس<br /><br />حقولك ايه واعيد لك ايه كله له آخر<br />دى خبطة جامدة وجت على عينك ياتاجر<br />يا وكستك دلوقت لا وارد ولا صادر<br />يحلها الفين حلال ربك قادر<br /><br />قل لي في عرض النبي ياحسين رايحين نلاقيها منين ومنين<br />والاش متجوز اثنين يا دنيا روقي جاتك البين<br />شوفوا البخيل يفضل موحوس ولو علقوا على بابه فانوس<br />فلوس دي ايه سكتر يا جاموس هيه السعادة في غنا النفوس<br /><br />نهايته ياللا بنا والاكسبريس بقى ع الرصيف<br />وادي حنا بقالنا كام يوم ما عملناش بحق رغيف<br />كل المحطات قبلي وبحري بقيت "لام اليف"<br />والسكة انقطعت من دي الهيصة يا لطيف يا لطيف<br /><br />ما قطعوا لنا التيفونات وعطلوا التلغرافات<br />عمركش سمعت الدلنجات بيسافروا ليها ببزابورتات<br />غلب حمار اللى ما له حمار يحملولك ست انفار<br />واهو السفر في الأيام دي صار على البهايم ليل ونهار<br /><br />شد الحزام على وسطك غيره ما يفيدك<br />لابد عن يوم برده ويعدلها سيدك<br />إن كان شيل الحمول على ظهرك يكيدك<br />أهون عليك ياحر من مَدّة إيدك<br /><br />قرب شيلني شيل لا تقولي كتير وقليل<br />لاتقلي كتير وقليل عمر الشدة ما تطول<br />عمر الشدة ما تطول عمرك مش زي الأول<br />هيلا هيلا هيلا هيلا هيلا هيلا هيلا هيلا<br />هيلا هيلا هيلا هيلا هيلا هيلا هيلا هيصة<br /><br /><br /><strong>رمضان مخلف هلال وهلال مخلف عيد<br />وكل يوم من ليالينا قديم وجديد<br />خلف بنيه وصبى خلف أمل وسعيد<br />وانا طبلتى بتغنى غنوه وتحكى حدوته<br /></strong><br /><br />أنا عندى يا ولاد الحلال حدّوته أنا والدى هو اللى عاشها. ولا حدّ قبلى نقشها فى حجر ولا مخطوط<br />كان والدى بالطبع زيى أراجوز ولكن حزاينى وانا كنت واد قطقوط<br />الخالق الناطق دماغى دما\غه الخالق الناطق كما الشمّوط<br />كان صوته، الله يرحمه، صفّاره وجسمه رايح جاى زى الفاره وعظمه يا نجارين بيلق فى الزعبوط<br />و فى يوم من الأيام .. خلى بالك معاى : هنا العقده ، ندهه الملك و كان ملك أعظم من العمده و عيّنه مضحك ولى العهده و قال له<br />» يا ألعب من القرموط<br />تضحّك الولد أعلى مراتبك ، تبكّى الولد اقطع رقبتك .. افهم كلامى وامشى بالمضبوط «<br />والدى ، الله يمسّيه بالخير ، ما كانش ناقصه .. طلّع سلاح أبيضانى و قطع رقبته بنفسه .. راح الولد فى البكا، وانا والدى مات مبسوط<br />أنا والدى مات مبسوط لأنه عكس أمر الملك أيام ما كان الملك ملك و مصروف الأمل مضغوط<br />و من ساعتها ، و انا عندى جيوب أنفيه وعينى كما الحنفيه و الدمع منى و فىَّ بحر ماله شطوط ....<br /><br /><br /><strong>كان ياما كان، يحكوا زمان دى الحكاية ..<br />إن الحمل<br />– يعنى الخروف الطفل –<br />وقف فى يوم يشرب من الغدير<br />- يعنى القناية -<br />والغابة خضرا والطيور بتغنى من حواليه،<br />الذئب<br />– يعنى الديب –<br />عوى من فوق عليه،<br />قال له:<br />يا مخلوق يا حقير<br />عكرت لى الميه وانا باشرب<br />لابد من أكلك جزاء لعملتك!<br />رد الحمل،<br />قال له:<br />لكين دى الميه جاية من حداك،<br />من فوق هناك.<br />قال له:<br />ماباتكلمش عن دلوقتى، عامْنَوِّل حصل.<br />عكرت لى عامنَوِّل المية وأنا باشرب،<br />لابد من أكلك !<br />- أنا عمرى ست شهور، وعامنول ما كنتش اتولدت<br />- عمرك ما عمركش، بلاش كلام ولَتْ،<br />يبقى أبوك هو اللى عكرها.<br />أيوه تمام .. هو أبوك.<br />لا بد من أكلك.<br />والغابة رنت بالانين والمضغ،<br />والعشب بات بالدم متحنى<br />وفى الصباح نزل الندى غسله<br />والغابة رجعت خضرا، والعصافير بتغنى<br />ده كان زمان ..<br />لكن يا حلو الديب لو اتهبل<br />ليّام دى ، واترازل على الحمل.<br />لا ح يبقى فيه حملان، ولا ديابه،<br />معلوم!<br />ولا حتبقى مدينة ولا غابة،<br />لكن خرابه،<br />وحتى ما فيهاش بوم<br /><br /></strong><br />كان فيه ولد صغير عنده اتناشر سنه<br />عيل مفعوص وقصير وغاوى فتونه<br />بيمثل دور فى ذهنه لشخص عظيم الشأن<br />ويوماتى يحلق دقنه ، مع إنه مالهش دقن<br />المجنون البعيد بالموس وخلاص ويحرت<br />لحد ما دقنه كبرت ، قال لك ده اليوم ده عيد<br />ووقف قدام مرايته يتنطط م الفرح<br />اكمنه ( حسب روايته ) زى باباه انجرح ..<br />تع شوفه بقى النهارده، راجل بيه قد الحيط<br />وصداغه كل فرده ، فيها من القطن غيط ،<br />يحلف ع النار والميه ، مهو حالق جمعتين ..<br />ودى قصة فلسفية ، مغزاها ف كلمتين :<br />شرم برم يا حلوللى، هأو أو ، إش إش ،<br />ترالاللى أمان يا لالاللى حرنكش ، طظ فش .<br /><br /><br /><strong>كتكوت ومعاه كتكوت تانى وكتكوت تالت<br />وانى كمانى أربع كتاكيت<br />إحنا كتاكيت ستّ هديّه<br />بنصَوْصَوْ صَوّ و نصَوْصَوْ صوّ<br />م الجهه ديه والجهه ديه<br />كلّنا سوا سوا وبنملا الجوّ<br />وتسقف لنا ستّ هديّه<br />وتعدّ تقول:<br />كتكوت ومعاه كتكوت تانى وكتكوت تالت<br />وانى كمانى أربع كتاكيت<br />إحنا كتاكيت ستّ هديّه<br />وبنسكُتْ كُتْ وبنتكلّم<br />وبننكتْ كتْ فى الأرضيّه<br />وتعدّى علينا وتسلّم<br />وتسّقف لنا ستّ هديّه<br />وتعدّ تقول:<br />كتكوت ومعاه كتكوت تانى وكتكوت تالت<br />وانى كمانى أربع كتاكيت<br />إحنا كتاكيت ستّ هديّه<br />إحنا الكتاكيت الكتكوته<br />وبنجرى بخطوه مهدّيّه<br />تاتا تاتا وتوته توته<br />بتسقف لنا ستّ هديّه<br />وتعدّ تقول:<br />كتكوت ومعاه كتكوت تانى وكتكوت تالت<br />وانى كمانى أربع كتاكيت<br />إحنا كتاكيت ستّ هديّه </strong><br /><br /><br />طلعت أدِبّ نزلت أدِبّ<br />وطالع نازل اقزقز لِبّ<br />أردبّ أرادِبّ<br />أرنبْ أرانِبّ<br />دا كله د اكله فى بطن الدِبّ<br />وكمثل الدُبّ كمثل الدِبّ<br />يجُب فى جُب يعبّى فى عِبّ<br />طلعت أدب نزلت أدبّ<br /><br />طلعت أدبّ أدبّ دبيب<br />ونزلت أدبّ سبع سراديب<br />أنا اخوك الدبّ ماانيش الديب<br />ومفنجل عينى تقول دا أديب<br />والاَّ دا عاشق داب فى دباديب<br />الحلو اللى بيغطس ويقبّ<br />طلعت أدب نزلت أدبّ<br /><br />طلعت أدبّ البط ما باضش<br />نزلت أدب أخوك ما قبضش<br />أنا باستعبط وما باستعبطش<br />أنا باتلخبط وما باتلخبطش<br />أنا صاحب رقّّه وصاحب بطش<br />تزفّر بقى والاَّ أسبّ<br />طلعت أدبّ نزلت أدبّ<br /><br />طلعت أدبّ برجل وإيد<br />ونزلت أدبّ وعيشه بتقيد<br />ريّحت رقبتى من التحويد<br />وعملت صغيّر قلت يا سِيد<br />إن كانّك مش شايف لبعيد<br />إعمل زيى على ظفرك شبّ<br />طلعت أدب نزلت أدبّ<br /><br />طلعت أدبّ السقف اترجّ<br />نزلت أدبّ البير اعرَجّ<br />العالم ماله ؟ العالم وَجّ<br />قال كلت حبيبك ؟ كلته ياحَاج<br />ويا حبيبى كان طعمك فجّ<br />إن كنت حبيب انا برضه مُحبّ<br />طلعت أدبّ نزلت أدبّ<br /><br />طلعت أدبّ ولا الأمراء<br />ونزلت أدبّ يا وز عراق<br />يا حياتى وموتى ولقا و فراق<br />و يوماتى بتاكل منى فى راق<br />آخرتى شماعه فى قصر فراء<br />ما حاسيبش غير الفرو المجربّ<br />طلعت أدبّ نزلت أدبّ<br /><br /><br /><strong>كان فيه جَمَل اسمه جَمَلْمَلْ<br />وفيه حُصَان اسمه حَصَنْصَنْ<br />مين اللى فيهم كان أجْمَل<br />مين اللى فيهم كان أحْسَن<br />محتار أقول<br /><br />جمل جململ يَتَحَمّلْ<br />طول السفر لا يَتَمَلْمَلْ<br />بالطبع كان هوّ الأجمل<br />أيام زمان شال المَحْمَل<br />إلى الحجاز<br /><br />حصان حصنصن فى الميدان<br />والضرب داير فى المليان<br />يشبّ ويقبّ بعنتر<br />بالطبع كان هوّ الأشطر<br />شوف البطل<br /><br />جمل جململ لمّا يقوم<br />يومين بياكل شهر يصوم<br />من السودان وصل الفيوم<br />الصبر طيّب<br /><br />حصان حصنصن كان بيطير<br />بجناح ملوّن فى الأساطير<br />والطيّارات زى العصافير<br />تلعب معاه<br /><br />جمل جململ ما قالش آه<br /><br />حصان حصنصن فوق الشطّ<br />قاس المسافه بنظره ونطّ<br />بقينا ع الشطّ التانى<br /><br />جمل جململ شالنى وحطّ<br />نور القمر فى أحضانى<br /><br />حصان حصنصن بارسم خطّ<br />يرقص عليه بالطول والعرض<br /><br />جمل جململ عَلَى ظَهْره<br />بالقى السما قريّبه م الأرض<br /><br />عاوزين تقولوا إيه بالظبط<br /><br />عاوزين نقول الاِتنين حلوين<br />الاِتنين يا شيخ أجمل من بعض<br />الاتنين كمان أحسن من بعض<br /><br />جمل جململ<br /><br />وحصان حصنصن<br /><br />جمل جململ<br />وحصان حصنصن<br />وانا وانت</strong> !<br /><br /><br />اوعى يمينك اوعى شمالك<br />اوعى الأزمة توقف حالك<br />اوعى وشك اوعى ضهرك<br />اوعى فوقك اوعى تحتك<br />اوعى لجيبك م الحرامية<br />اوعى لروحك م الحانوتية<br />اوعى الكوكايين يلحس مخك<br />اوعى م البوكر ليطخك<br />اوعى م الروماتيزم في رجلك<br />اوعى الجوزة تطير عقلك<br />يمينك شمالك اوعى<br /><br />ياللي ماشية خطوة خطوة<br />طالعة فيها عاملة حلوة<br />غطي ايديك غطي رجلك<br />غطي وشك غطي صدرك<br />اوعك تترقصي في السكة<br />اوعك تقوليلي آلا فرانكه<br />اوعك تتغمزي بعنيكي<br />والناس ملمومين حواليكي<br />الراجل لو بصبص ليكي<br />ايه ذنبه ده الحق عليكي<br />يمينك شمالك اوعى<br /><br />وردة وردة وردة وردة<br />يا فندي حودة حودة<br />ياللا وسع بلاش زحمة<br />اسمع اسمع مني كلمة<br />إن كنت صحيح بدك تخدم<br />مصر أم الدنيا وتتقدم<br />لا تقول نصراني ولا مسلم<br />ولا يهودي ياشيخ اتعلم<br />اللى اوطانهم تجمعهم<br />عمر الأديان ما تفرقهم<br />يمينك شمالك اوعى<br /><br /><br /><strong>مسحراتى<br />منقراتى<br />مره فى حياتى<br />دخلت سيما<br />شفت اللى آتى<br />كان ياما كان<br />حمار حصان<br />بجوزين حوافر<br />وجوز ودان<br />عليه مسافر<br />شجيع جبان<br />يشب فوقه<br />ويحدف بطوقه<br />ويقل ذوقه<br />عيان بيان<br />وحبيبته شقرا<br />فى إيديها زهره<br />فى عينيها زغره<br />ودموع كمان<br />طب سيبنا من دى<br />سيبها فى أمان<br />أدى فى الأمام<br />أحمر وهندى<br />داهن دهان<br />دا هندى هان<br />أبو عين قويه<br />بالبندقيّه<br />هات يا نشان<br />يقتل له مِيّه<br />ويمضغ لبان<br />وبعد غيبته<br />يرجع بخيبته<br />يحضن حبيبته<br />شوف الحنان<br />ودا علم والا<br />دا حلم والا<br />دا فيلم والا<br />دا شىء جنان<br />سهرتنا ضاعت<br />على بضاعةْ<br />الأمريكان<br />كان ليه ندوّر<br />فى غير مكان<br />إحنا اللى نوّر<br />فينا الأدان<br />لازم نطوّر<br />حواديت زمان<br />فن الميدان<br />شعر العروبه<br />بحر العذوبه<br />والعنفوان<br />زى العيدان<br />نبتت ولادى<br />فى كل ناحيه<br />باهتف لتحيا<br />فنون بلادى<br /><br /></strong><br />يهون الله يعوض الله ع السقايين<br />دول شقيانين متعفرتين م الكوبانية<br />خواجاتها جونا حايطفشونا<br />ليه بيرازونا دي صنعة أبونا<br />ما تعبرونا يا خلايق<br /><br />عملوها فينا طيب رضينا<br />ما يلزقونا ويشغلونا<br />و ينفعونا يا خوانا<br />اشمعنى يعني باولو و يني<br />ياكلوا الصينية وياخدوا الماهية<br />م الكوبانية علاولا<br />وابن البلد دي يطفح الدردي<br />مايتعدلشي يمكن مايطولشي<br />يتعشى طرشي يعوض الله<br />يهون الله ويعوض الله<br />دا حنا بنسير حسبة بتباشير<br />وشكوكنا كتير واهيه ماشية<br /><br />يهون الله يعوض الله ع السقايين<br />دول شقيانين متعفرتين م الكوبانية<br />خواجاتها جونا حيطفشونا<br />ليه بيرازونا دي صنعة أبونا<br />ما تعبرونا يا خلايق<br /><br />دي شركة غلسة ميتها نجسة<br />تلقاها حدقة وخضرة وزرقة<br />وقال ايه رايقة دي لهجة<br />إخيه عليها بيحطوا فيها<br />كربونات ونبيت وسلفات كبريت<br />وبودرة عفريت هاهاهأه<br />يابنت ياللي واقفة على البهلي<br />ما تندهي لي دي ميتي نيلي<br />إشربي وإدعيلي يعوض الله<br />روحي الوي بوزك<br />في وش جوزك<br />خليه يطير ويجيب لك زير<br />وانزلي تكسير في الحنفية<br /><br />يهون الله يعوض الله ع السقايين ...<br /><br /><br /><strong>ياللي انت بيتك قش مفروش بريش<br />تقوي عليه الريح .. يصبح ما فيش<br />عجبي عليك حواليك مخالب كبار<br />و ما لكش غير منقار و قادر تعيش<br />عجبي !<br /></strong><br />إنشد يا قلبي غنوتك للجمال<br />و ارقص في صدري من اليمين للشمال<br />ما هوش بعيد تفضل لبكره سعيد<br />ده كل يوم فيه الف الف احتمال<br />عجبي !<br /><br /><strong>حدوته عن جعران و عن خنفسه<br />اتقابلوا حبوا بعض ساعة مسا<br />و لا قال لهم حد اختشوا عيب حرام<br />و لا حد قال دي علاقة متدنسة<br />عجبي ! </strong><br /><br />غمست سنك في السواد يا قلم<br />عشان ما تكتب شعر يقطر ألم<br />مالك جرالك إيه يا مجنون ... و ليه<br />رسمت ورده وبيت و قلب و علم<br />عجبي !<br /><br /><strong>غمض عينيك و ارقص بخفة و دلع<br />الدنيا هي الشابة و انت الجدع<br />تشوف رشاقة خطوتك تعبدك<br />لكن انت لو بصيت لرجليك ....تقع<br />عجبي ! </strong><br /><br />ولدي نصحتك لما صوتي اتنبح<br />ما تخافش من جني و لا من شبح<br />و ان هب فيك عفريت قتيل إسأله<br />ما دافعش ليه عن نفسه يوم ما اندبح<br />عجبي !<br /><br /><strong>يا عندليب ما تخافش من غنوتك<br />قول شكوتك و احكي علي بلوتك<br />الغنوه مش ح تموتك إنما<br />كتم الغنا هو اللي ح يموتك<br />عجبي !<br /></strong><br />الضحك قال يا سم ع التكشير<br />امشير و طوبه وانا ربيعي بشير<br />مطرح ما باظهر بانتصر ع العدم<br />انشالله اكون رسماية بالطباشير<br />عجبي !<br /><br /><strong>علم اللوع اضخم كتاب في الأرض<br />بس اللي يغلط فيه يجيبه الأرض<br />أما الصراحة فأمرها ساهل<br />لكن لا تجلب مال و لا تصون عرض<br />عجبي ! </strong><br /><br />أنا شاب لكن عمرى ولا ألف عام<br />وحيد ولكن بين ضلوعى زحام<br />خايف ولكن خوفى منى أنا<br />أخرس ولكن قلبى مليان كلام<br />عجبى !!<br /><br /><strong>عينى رأت مولود على كتف أمه<br />يصرخ تهنن فيه يصرخ تضمه<br />يصرخ تقول يا بنى ما تنطق كلام<br />ده اللى ما يتكلمش يا كتر همه<br />عجبى !! </strong><br /><br />يا باب أيا مقفول . . إمتى الدخول<br />صبرت ياما واللى يصبر ينول<br />دقيت سنين . . والرد يرجع لى : مين ؟<br />لو كنت عارف مين أنا . . كنت أقول<br />عجبى !!<br /><br /><strong>أنا كنت شىء وصبحت شىء ثم شىء<br />شوف ربنا . . قادر على كل شىء<br />هز الشجر شواشيه ووشوشنى قال :<br />لابد ما يموت شىء عشان يحيا شىء<br />عجبى !! </strong><br /><br />أنا قلبى كورة . . والفراودة أكم<br />ياما اتنطح وانشاط .. وياما اتعكم<br />واقول له كل ح ينتهى فى المعاد<br />يقول بساعتك ؟ والا ساعة الحكم ؟<br />عجبى !!<br /><br /><strong>بلياتشو قال إيه بس فايدة فنونى ؟<br />وتلات وقق مساحيق بيلونونى<br />والطبل والزمامير وكتر الجعير<br />إذا كان جنون زبونى زاد عن جنونى<br />عجبى !! </strong><br /><br />حاسب من الأحزان وحاسب لها<br />حاسب على رقابيك من حبلها<br />راح تنتهى ولابد راح تنتهى<br />مش انتهت أحزان من قبلها ؟<br />عجبى !!<br /><br /><strong>الدنيا من غير الربيع ميته<br />ورقة شجر ضعفانه مفتفته<br />لأ يا جدع غلطان تأمل وشوف<br />زهر الشتا طالع فى عز الشتا<br />عجبى !!<br /></strong><br />سرداب فى مستشفى الولاده طويل<br />صرخات عذاب ورا كل باب وعويل<br />. . وفى الطريق متزوقين البنات<br />متزوقين للحب والمواويل<br />عجبى !!<br /><br /><strong>سهير ليالى وياما لفيت وطفت<br />وف ليله راجع فى الضلام قمت شفت<br />الخوف . . كأنه كلب سد الطريق<br />وكنت عاوز أقتله . . بس خفت<br />عجبى !! </strong><br /><br />مع إن كل الخلق من أصل طين<br />وكلهم بينزلوا مغمضين<br />بعد الدقايق والشهور والسنين<br />تلاقى ناس أشرار وناس طيبين<br />عجبى !!<br /><br /><strong>يا طير يا عالى فى السما طظ فيك<br />ما تفتكرشى ربنا مصطفيك<br />برضك بتاكل دود وللطين تعود<br />تمص فيه يا حلو . . ويمص فيك<br />عجبى !!<br /></strong><br />أنا اللى بالأمر المحال اغتوى<br />شفت القمر نطيت لفوق فى الهوا<br />طلته ماطلنوش ايه أنا يهمنى<br />وليه مادام بالنشوى قلبى ارتوى<br />عجبى !!<br /><br /><br /><strong>طلعت يا محلا نورها شمس الشموسة<br />يالا بينا نملا ونحلب لبن الجموسة<br /><br />قاعد ع الساقية يا خلي أسمر وحليوة<br />عوج الطاقية وقاللي غني لي غنيوة<br />قلت له يا محمد حبك شقلبلي عقلي<br />ميتى النار تبرد واعرف راسي من رجلي<br /><br />طلعت يا محلا نورها شمس الشموسة<br />يالا بينا نملا ونحلب لبن الجموسة<br /><br />ندرن علي يا حبي لو يطفى شوقي<br />لاطبخ ملوخية وادبح جوزين عتاقي<br />واعمل صينية فيها فطير و رقاقي<br />ومهلبية واعزم أهلي و رفاقي<br /><br />طلعت يا محلا نورها شمس الشموسة<br />يالا بينا نملا ونحلب لبن الجموسة<br /><br />جاية م الترعة سمعوا رنة خلخالي<br />لحجوني سبع جدعان طالبين وصالي<br />ندروني ياخويا وراحوا واقعين في جمالي<br />قدموا لأبويا مهري ميتين خيّالي<br /><br /><br /></strong>واللى بيعلَى بيعلّى<br />وقولة القلوب عند بعضها<br />واصله السما بأرضها<br />وبنى آدم سلاح نفسه وصاحب رأى<br />وقبل الناس ما تكتر السنين كانت كتيره<br />افرش حصيره وخلى البساط أحمدى<br />الليل بساط يا مصادفنى من آخر السكه<br />قرب من الناحيه دى<br />ماليش خيال الا ان رمتنى بنور هادى<br />ورميت علىّ السلام<br /><br />فى مره طالع من حسن الاكبر على باب الخلق<br />بين مغربيه وعشا ، لقيت القمر فى وشى كبير<br />وقريّب.<br />تطلع عيونك سلم سطوح بيت:<br />على حدفة دراع من هنا القلعه ومن هنا العتبه،<br />والقمر لون الحنان الصيفى والماضى الصغير.<br />زى اللى خجلان شويه من بهجته وحسنه<br />وعلى مذهب شارع محمد على الترموايات<br />قاطعه الخليج بجرس يجرى.<br />والقمر ميّال لكل الدنيا ، مالى الدنيا.<br />فوق العباسيه ولبعد الزيتون على نخل.<br />لبلاد تقول نجع وبلاد تقول كوم. فى نفس<br />اليوم ، على مزلقان الجيزه و مقبل سارح<br />غيطان ، واقف على كل محطات السكه الحديد،<br />واسكندريه.<br />فى باب الخلق اتملا القرطاس بفول أخضر<br />رميت علىّ السلام نورت يا ولدى<br />يجمعنى ايدى وايدها ومعانا ولاد<br />شبابين<br />الشوق ما بيسيبش قلبى<br />الا ساعات على مهل<br />أنا خدت خطوة صبا<br />وماشى زى اللى ماتحبش قدمهم رصيف<br />يا كلّ الناس<br />كنا قبايل وساحرنا قمر بدوى<br />ونزلنا زرع وخمايل وحضنا القمر فى الريف<br /><br /><br /><strong>عمرك سافرت الفجر عمرك بكيت<br />عمرك شقيت من غنوه تسمعها<br />عمرك لقيت نفسك ومديت لها خطوة صبا<br />عمرك شكرت أخوك وسقف البيت<br />وعيون تودك والنظر واللقمه<br />عمرك خجلت لأن أطيب منك<br />انت اللى قادر تنفعه<br />عمرك سألت سؤال<br />عمرك كتبت لمنكسر مكتوب<br />ايدك بترعش لما بيملّى<br />عمرك بدأت عمل وكنت شباب<br />عمرك سهرت عليه<br />عمرك جمعت الصبر والحرقه<br />عمرك خليت تحت الشجر والنور<br />عمرك طلبت من الريحان دنيا<br />عمرك مشيت بين الحبايب مغمّض<br />فى كل خطوه تقول بلادى جميله<br /></strong><br /><br />مليحة قوى القلل القناوى<br />رخيصة قوى القلل القناوى<br />قرب حدانا خدلك قلتين<br /><br />خسارة قرشك وحياة ولادك<br />ع اللى ماهواش من طين بلادك<br />ده ابن بلدك ما يبلفكشى<br />ما تعدموشى ولا يعدمكشى<br />دمك من دمه ما يفرقكوا شىء<br /><br />رخيصة قوى القلل القناوى<br />قرب حدانا خدلك قلتين<br /><br />مش بزيادانا بقينا عرة<br />وكل حاجة من شغل بره<br />شوفوا الخواجة قلع عينينا<br />وخلا غيرنا جلس علينا<br />يادى الفضيحة يادي السخام<br /><br /><br /><strong>انا حُرَّه واموتْ في الحريَّه<br />ومزاجي أعمل سحليَّه<br />أزحف على الأرض وع الحيطة<br />واطلع وانْزل واعمل زيطة<br />واضرب في الشمسْ طرمبيطه<br />انا حُرَّه بديلي وبراسي<br />وما حدشّ يكتم انْفاسي<br />وما احْطش ماسك لاحْساسي<br />ولا احْط قزاز<br />ولا أقفل شيش<br />عقلي يا هزاز<br />كلك نغاشيش<br />وانا حُرَّه أعيشْ<br />انا عاوزه أعيشْ<br />انا بدي أعيشْ<br />انا نفسي أعيشْ<br />على كيف كيفي<br /><br />انا حُرَّه وأموتْ في الحريهّ<br />ومزاجي أعمل سحليه<br />أرقع في الشمسْ الزغروطه<br />واخد حمامْ من غير فوطه<br />انا حُرَّه براسي وبديلي<br />حُرَّه بنهاري وبليلى<br />حُرَّه بمناخيري القطقوطه<br />انا حره بخشمي ماهوش خشمك<br />وما احْطش برقع ولا يشمك<br />ولا احْط قزاز<br />ولا أقفل شيش<br />عقلي يا هزاز<br />كلك نغاشيش<br />وانا حُرَّه أعيشْ ...<br /><br />انا حُرَّه وأموتْ في الحريهّ<br />ومزاجي أعمل سحليه<br />انا أبقي سحليَّه وسيمه<br />ويجيني برص بتاع سيما<br />وبتاع مزيكا وتَرا لمْ لمْ<br />وأتاري في حضنه وانا با حلم<br />ويقول لي ابتسمي يا بسيمه<br />وافرحى بالْميه وبالْخضره<br />ما تحطيش احْمر ولا بورده<br />ولا احْط قزاز<br />ولا أقفل شيش<br />عقلي يا هزاز<br />كلك نغاشيش<br />وانا حره أعيشْ ...<br /><br />انا حُرَّه واموتْ في الحريهّ<br />ومزاجي أعمل سحليَّه<br />سحليَّه وحبايبْي سحالي<br />انا حره بحالي ومحتالي<br />حُرَّه أصَحصَحْ والا أسخْسخْ<br />والاَّ أغني وقلبي يشخْشخْ<br />أبواب الدنيا فاتحه لِي<br />ما اقعدشي في الأودْه لوحدي<br />وما احْطش إيدِّي على خدي<br />ولا احْط قزاز<br />ولا أقفل شيش<br />عقلي يا هزاز<br />كلك نغاشيش<br />وانا حره أعيشْ ...<br />انا عاوزه أعيشْ<br />انا بدي أعيشْ<br />انا نفسي أعيشْ<br />على كيف كيفي.<br /></strong><br /><br />عطشان يا صبايا دلونى على السبيل<br />فى قلبى ولعه قايده من كتر "السكسابيل"<br />شكل الصبايا يهبل فى لبس المناطيل<br />رحت لحكيم يداوى نار القلب العليل<br />فتح الكتاب وقال لى عندك عقدة خليل<br />وخليل ده كان عجلاتى فى درب المهابيل<br />واللى قال الكلام ده أستاذ عالم جليل<br />اسمه فارويد ولازم نعمل لك تحاليل<br />يا بهيه وخبرينى ع اللى قتل القتيل<br />قتلوه السود عيونك واللا الهم التقيل<br />واحكم يا قاضى المحاكم بالعدل والدليل<br />قال : اللى جيبه فاضى ممنوع يعشق جميل<br /><br /><br /><strong>وبهيه ، فى المحاكم شدت واحد وكيل<br />عند البوفيه كان واقف بيشرب جنزبيل<br />والجنزبيل ده أصله للصوت مالوش مثيل<br />مكتوب عليه ف مجلد "مرافعات هابيل ،<br />يشرب منه المحامى ، يمسح أجدع زميل ،<br />ويفحم النيابه ، ويقصف النخيل . .<br />وبهية ماشية جنبه فى كوريدور طويل ،<br />تشرح له ، وهى تبكى، وتبلل مناديل ،<br />وتقول له : كتير عليا، يقول لها :<br />قليل،<br />اتنين ريال يا وليه ، مبلغ تافه ضئيل ،<br />خدى بالك م الفصاحه، ومن العلم الاصيل ،<br />والإش لما يحصل ، مفعول الجنزبيل . .<br />عنها ، ودخل ع القاضى، دخلة أبو زيد تقيل ،<br />خبط الترابيزه وقال له،<br />أنا طالب التأجيل<br /></strong><br /><br />اقرأ يا شيخ قفاعة تلغراف آخر ساعة<br />اللي في جورنال البورص<br />وأنا أبقى أحلق ذقني إن ماكنتش ترقص<br />ترقص ترقص ترقص<br /><br />الصلح صبح قلسطة والعيشة هتبقى قشطة<br />ياقساتذة قولم هش<br />ياقساتذة قولوا براوة الحربُ خلاص فينيشٌ<br />فينيشٌ فينيشٌ فينيشٌ<br /><br />بعد أكل التسقية والسلطة والطعمية<br />اللي بتهد الحيل<br />نرقع لنا اقتين ثلاثة سمن بلحم الخيل ارقع<br />ارقع ارقع ارقع<br /><br />مادام الضاني غالي وكذلك العجالي<br />مش لازم ندقق<br />حصانا أو حمارا أو بغلا مش راح نعتق قبدا<br />قبدا قبدا قبدا<br /><br />ياما بكرة حنبقى نقلّس ع التجار لما تفلس<br />وزي مانتفلق<br />يتفلقوا هما كمان واحنا نضحك هقهق<br />هقهق هقهق هقهق<br /><br />يالا نقلوظوا العمة ألا مودا ونستحمى<br />بصفيحة كالونيا<br />ونسافر على أوروبا نتفرج ع الدنيا<br />تيريرم تيريرم تيريرم<br /><br />نسوانها قلماظية لا تقول لي مهلبية<br />قبدا قبدا إيش جاب<br />قربت أسيح قربت أسخسخ قربت أتكهرب الحق<br />ياسلام على حطة بطة نطة حطة نطتهم<br />على خفة نتفة خفة نتفة خفة نتفتهن<br /><br />سيبك م الفقهنة خالص من بكره هتبقى لابس بدل العمة كاسكيت<br />فوزافي آلف بي تي كسكيليا علي يا بتاع الزيت<br />روميو وجولييت في البيت<br /><br />قرشت مرشت قرشت مرشت<br />فرشت وقالتلي اقعد<br />عكشت نكشت قرشت مرشت<br />يا حلاوتها فري جود<br /><br /><br /><strong>يوم الخميس،<br />واللب، والأحلام، فى كيس<br />طرزان بيغطس فى الهويس.<br />طرزان جدع،<br />طرزان شديد،<br />دراعه أجمد م الحديد.<br />قزقزت نص اللب، هاه ..<br />طرزان بيصرخ:<br />عا عا عاه ..<br />خنق الأسد،<br />طحن الدماغ، عجن الجسد ..<br />قرقشت باقى اللب، من غير قزقزه،<br />طرزان صرخ قال:<br />عاعاعاه..<br />صرخت أنا كمان وراه.<br />ولما قال لشيتا: يا امه زغرطى ..<br />وحط رجله ع التعيس، فوق التراب،<br />حطيت معاه رجلى ، بدون جزمة وشراب،<br />ورسمت بعيون الخيال، بدل الأسد،<br />محمود أفندى حسين .. مدرس الحساب!<br /><br /></strong><br />الشارع قال للحارة :<br />إخييه ..<br />ريحتك طعميه ، وفول وبصارة ..<br />آييياه ..<br />كل بيوتك بغدادلى<br />مافيهاش تكييف<br />وبيبانك نازله لتحت، بدال ماهى طالعه لفوق،<br />ولا حتى ليكى رصيف ،<br />ستاتك بلدى ، وليل ونهار ع العتبه<br />قاعدين كده جوق ..<br />رجالتك نكته وعجبه ،<br />ولا يعرفو ذوق ،<br />وعيالك دول ،<br />نسانيس مقاصيف الرقبه ،<br />الحاره ردت رد ..<br />خللى الشارع ينسد !<br /><br /><br /><strong>كلامى فى واحد دكتور<br />بعت لعيلته تلات اسطر<br />.. أطيب تحيه و أما بعد<br />انا ابنكم : الدكتور سعد<br />ورا الستاره أخدت لى دُش<br />نشفت جسمي بالبشكير<br />قعدت قعده فى ركن العُش<br />قررت من بعد التفكير<br />ما ارجعش تانى للدبان<br />و أعيش هنا فى ظل سوبرمان<br />و بلغوا اختى بهانه<br />سلام مراتى سوبرمانه<br />على فكره اسمى بتنطقه سد<br />ما فيش لزوم أتلقى الرد<br /><br />– يا دمك الشهد بيقطر<br />بعت لعيلته تلات اسطر<br /><br />رديت عليه بالمستعجل<br />على شريط فنى مسجل<br />على الأثير صوتى يجلجل<br />خساره فيك التربيه<br />شقا الإيدين الفلاحه<br />خساره شغل الترزيه<br />فى بدلتك يا متقيف<br />اخدت دش و متليف<br />قعدت قعده بالراحه<br />عندك شتا و الا مصيّف<br />بقى البلاد السفاحه<br />خدودها زى التفاحه<br />بقى انت عاوز تتكيف<br />بقى انت مش قادر تصبر<br />بعت لعيلته تلات اسطر<br /><br />يا أيها الولد المبعوث<br />يا خايب الرجا يا متعوس<br />من حق تغوى بلاد بره<br />و من بلادك تتبرا<br />عشان هنا عندنا دبان<br />و عندنا جبهه و ميدان<br />و عندنا اشتراكيه كمان<br />خايف لنكشف بالمجان<br />خايف تناوب فى مبره<br />على يمين شق التعبان<br />خايف لتيجى تروح محدوف<br />وحدك فى وحده فى نجع شادوف<br />وسط الكفور المغبره<br />ما بين قنا و ما بين الاقصر<br />بعت لعيلته تلات اسطر<br /><br />سلام ما يوصلكش سلام<br />من الحمام فى أبراجه<br />يا غاوى راحه و استجمام<br />لازم هناك أهل شيكاجو<br />العصبجيه بيحتاجوا<br />لطب سعد و لعلاجه<br />ريل على عظم دولارهم<br />إلهى تتهنى بنارهم<br />نينتك هنا يا سعد سعود<br />ابوك شرح لها افكارهم<br />وصف لها جنة هوليود<br />حكى لها عن تمييز السود<br />يا اللى انت أبيض مش مولود<br />قعدت تقول ربنا يستر<br />بعت لعيلته تلات اسطر<br /></strong><br /><br />سالمة يا سلامة آه يا سالمة يا سلامة<br />سالمة يا سلامة رحنا وجينا بالسلامة<br />صفر يا وابور واربط عندك نزلنى فى البلد دى بلا أميركا بلا أوربا مافى شئ أحسن من بلدى<br />دى المركب اللى بتجيب احسن من اللى بتودى يا اسطى بشندى<br />ويا سالمة يا سلامة<br /><br />سلطة ما سلطة أهو كله مكسب حوشنا المال وجينا<br />شفنا الحرب وشفتا الضرب وشفنا الديناميت بعنينا ربك واحد عمرك واحد ادى احنا اهه رحنا وجينا<br />ايه خس علينا<br />يا سالمة يا سلامة<br /><br />صلاة النيى ع الشخص منا قرطة ميه بلا قافية<br />اللى ف جيبه يفنجر به والبركة فى العين والعافية<br />ح تاخد ايه م الدنيا غير الستر يا شيخ خليها ماشية دنيا فانية<br />سالمة يا سلامة<br /><br />دى الغربة ياما بتورى بتخلى الصنايعى بيرطن<br />مطرح ما يروح المصرى برضه طول عمره ذو تفنن<br />وحياة ربنا المعبود وى آر فرى جود ياسطى محمود قدها وقدود<br />سالمة ياسلامة<br /><br /><br /><strong>النخل فى العالى والنيل ماشى طوالى<br />معكوسه فيه الصور .. مقلوبه وانا مالى<br />يا ولاد انا ف حالى زى النقش فى العواميد<br />زىّ الهلال اللى فوق مادنه بنوها عبيد<br />و زىّ باقى العبيد باجرى على عيالى<br />باجرى و خطوى وئيد من تقل أحمالى<br />محنيه قامتى .. و هامتى كأن فيها حديد<br />و عينيا رمل العريش فيها و ملح رشيد<br />لكنى بافتحها زى اللى اتولدت جديد<br />على إسم مصر<br /><br />مصر .. التلات أحرف الساكنه اللى شاحنه ضجيج<br />زوم الهوا و طقش موج البحر لمّا يهيج<br />وعجيج حوافر خيول بتجر زغروطه<br />حزمة نغم صعب داخله مسامعى مقروطه<br />فى مسامى مضغوطه مع دمّى لها تعاريج<br />ترع و قنوات سقت من جسمى كل نسيج<br />و جميع خيوط النسيج على نبره مربوطه<br />أسمعها مهموسه والاّ اسمعها مشخوطه<br />شبكة رادار قلبى جوّه ضلوعى مظبوطه<br />على إسم مصر<br /><br />على إسم مصر التاريخ يقدر يقول ما شاء<br />أنا مصر عندى أحب و أجمل الأشياء<br />باحبها و هىَّ مالكه الأرض شرق و غرب<br />و باحبها و هىَّ مرميه جريحة حرب<br />باحبها بعنف و برقه وعلى استحياء<br />واكرهها والعن أبوها بعشق زىّ الداء<br />واسيبها و اطفش فى درب و تبقى هىّ ف درب<br />و تلتفت تلتقينى جنبها فى الكرب<br />والنبض ينفض عروقى بألف نغمه و ضرب<br />على إسم مصر<br /><br />مصر النسيم فى الليالى و بيّاعين الفل<br />و مرايه بهتانه ع القهوه .. أزورها .. و اطلّ<br />ألقى النديم طلّ من مطرح ما انا طَلّيت<br />والقاها برواز معلّق عندنا فى البيت<br />فيه القمر مصطفى كامل حبيب الكل<br />المصرى باشا بشواربه اللى ما عرفوا الذل<br />و مصر فوق فى الفرانده واسمها جولييت<br />ولما جيت بعد روميو بربع قرن بكيت<br />و مسحت دمعى فى كمى ومن ساعتها وعيت<br />على إسم مصر<br /><br />مصر السما الفزدقى وعصافير معديّه<br />والقله ممليّه ع الشباك .. منديّه<br />والجد قاعد مربّع يقرا فى الجرنال<br />الكاتب المصرى ذاته مندمج فى مقال<br />و مصر قدامه اكتر كلمه مقريه<br />قريتها من قبل ما اكتب اسمى بإيديا<br />و رسمتها فى الخيال على أبدع الأشكال<br />و نزلت أيام صبايا طفت كل مجال<br />زىّ المنادى و فؤادى يرتجف بجلال<br />على إسم مصر<br /><br /></strong>قوم يامصري مصر دايما بتناديك<br />خد بنصري نصري دين واجب عليك<br />يوم ماسعدي راح هدر قدام عنيك<br />عيد لي مجدي اللي ضيعته بإيديك<br />شوف جدودك في قبورهم ليل نهار<br />من جمودك كل عضمة بتستجار<br />صون آثارك ياللي دنست الأثار<br />دول فاتولك مجد وانت فت عار<br /><br />شفت أي بلاد يامصري في الجمال<br />تيجي زي بلادك اللي ترابها مال<br />نيلها جاي السعد منه حلال زلال<br />كل حي يفوز برزقه عيشته عال<br />يوم مبارك تم لك فيه السعود<br />حب جارك قبل ما تحب الوجود<br />ايه نصارى ومسلمين قال ايه ويهود<br />دي العبارة نسل واحد م الجدود<br /><br />ليه يامصري كل احوالك عجب<br />تشكي فقرك وانت ماشي فوق دهب<br />مصر جنة طول ما فيها انت يا نيل<br />عمر ابنك لم يعيش ابدا ذليل<br />يوم مبارك تم لك فيه السعود<br />حب جارك قبل ما تحب الوجود<br />ايه نصارى ومسلمين قال ايه ويهود<br />دي العبارة نسل واحد م الجدود<br /><br /><br /><strong>النور ملو الشوارع ،<br />ومليون راديو والع ،<br />الساعة اتنين صباحا ،<br />لكين إيه الموانع !<br />.. الخلق رايحه جايه ،<br />والدنيا لسه حيه ،<br />مليانه بالهأو أو ،<br />و زعيق القهوجية .<br />. . واحد يقول لواحد :<br />خليك يا عم قاعد ،<br />التانى يقول له : شكرا ،<br />ده انا م المغرب مواعد ،<br />فيه سهره لسه عندى ،<br />فى بيت فلان افندى ،<br />ح ناكل حاجة حلوه ،<br />ونشرب تمر هندى ..<br />واللى تروح دالقه جردل ،<br />فوق حضرة المبجل ،<br />طبعا صاحبنا يزعل ،<br />وينفجر شتايم …<br />والحى كله يوصل ،<br />ما بين مصلح و لايم ،<br />اللى يقول :<br />يا جماعة …<br />واللى يقول : يا بهايم ..<br />ومطرب الاذاعة ،<br />يصرخ ، وف وجده هايم ..<br />ولو طرطقت ودنك ،<br />فى وسط دى العظايم ،<br />تسمع مسحراتى ،<br />بطبله صوتها واطى ،<br />بيقول :<br />اصحى يا نايم<br /></strong><br /><br />اصحى يا نايم<br />وحّد الدايم<br />وقول نويت<br />بكره ان حييت<br />الشهر صايم<br />والفجر قايم<br />اصحى يا نايم<br />وحّد الرزاق<br />رمضان كريم<br /><br />مسحراتى<br />منقراتى<br />خالاتى عماتى سيداتى<br />على تل عجوه وعسل وسمن<br />ولا مجلس الأمن سهرانين<br />لت وعجين<br />يبنوا الهرم<br />قالت حماة المحترم<br />يا كعك يا سيد الكرم<br />نبطلك فى المشمشى<br /><br />يا بنت قومى وفرفشى<br />لا تحوشى<br />ولا تختشى<br />احمى الوابور واستحمشى<br />إشى وإشى<br />تلاقيه مشى<br />إشى نغبشى<br />واشى حبشى<br />واشى دندشى<br />واشى انقشى<br />واشى ينحشى<br />واشى رشرشى<br />سكر عليه<br />بركة ايديه<br />فرحة عينيه<br />قال ايه وايه<br />المشى طاب له<br />والدق على طبله<br />ناس كانوا قبله<br />قالوا فى الأمثال:<br />"الرجل تدب مطرح ماتحب"<br /><br /><br /><strong>المشى طاب لى<br /><br />والدق على طبلى<br />ناس كانوا قبلى<br />قالوا فى الأمثال:<br />"الرجل تدب مطرح ماتحب"<br />وانا صنعتى مسحراتى فى البلد جوال<br />حبيت ودبيت كما العاشق ليالى طوال<br />وكل شبر وحته من بلدى<br />حته من كبدى<br />حته من موال:<br /><br />رمضان مخلف هلال وهلال مخلف عيد<br />وكل يوم من ليالينا قديم وجديد<br />خلف بنيه وصبى خلف أمل وسعيد<br />وأنا طبلتى تغنى غنوه وتحكى حدوته<br />بالسمن ملتوته<br />ونرجع نقول ونعيد<br />رمضان مخلف هلال وهلال مخلف عيد<br /></strong><br /><br />هز الهلال يا سيد كراماتك لاجل نعيد<br />يكفي اللي حصل كام يوم ووصل بقى زرع بصل<br />هديت واهو راق الحال ورجعنا للأشغال<br />دا الموظف منا مش وش خناق ولا شومه<br />لما يحمر عينه والا يقوّم له قومه<br />حد الله ما بيني وبينك غير حب الوطن ياحكومة<br /><br />عشرين يوم راحو علينا إن شا الله ياخدوا عنينا<br />بس المقصود يبقى لنا وجود والدنيا تعود<br />ياما شفنا م الستات طلعوا وعملوا مظهرات<br />والكناسين رخرين راسهم والف مقشة<br />ما يكنسوا بس كنسه ولا يرشوا رشة<br />والصنايعية راحم جايبين ضلفة أحسن ورشة<br /><br />الغلب اللي شاربينه يا ريت العالم شايفينه<br />دي ماهية ايه الكام جنيه يا خواتي بريه<br />من خمسة منه تروح وبقيته أقول ابوح<br />وبسلامتها الست بتاعتي ما تتوصاشي<br />ولاتولدليش في البطن إلا اتنين كده ع الماشي<br />وييجي الجزار والخضري والبقال يلعنوا ابو خاشي<br /><br />هز الهلال يا سيد كراماتك لاجل نعيد<br />يكفي اللي حصل كام يوم ووصل بقى زرع بصل<br />هديت واهو راق الحال ورجعنا للأشغال<br />دا الموظف منا مش وش خناق ولا شومه<br />لما يحمر عينه والا يقوّم له قومه<br />حد الله مابيني وبينك غير حب الوطن ياحكومة<br /><br /><br /><strong>ليه يا عرب تستبدل القفطان<br />عرب التفت على مهله واتبسّم<br />يا سنته نوارة الأوطان<br />خلى الكلام يحلى ويتقسم<br />يا سامعين أبناء بلد واحده<br />تحت السما الواحده عرب بيقول:<br />أيام تسعتاشر بتحيى الحى<br />و تخلى فنان البلد مسئول<br />يا سامعين يا اهل الزمان الجاى<br />ليلكم منور فى العزب والقرى<br />كان ياما كان من مبدأ الذاكره<br />الشمس طالعه وصوتى مش سامعاه<br />حرمت أغنى لها وانا فى الدرا<br />فتحت شباكى وقلبى معاه<br />وجبت ريح البحر للقاهره<br />وطلقت حنجرة الفتاه والشاب<br />ورفعت فنى الى مقام الشعب<br />فنى رجع للأصل بالطفره<br />رجعت لى مصر بقوة الثوره<br />الثوره ضاربه فى صميمى جدور<br />أغنيه أمنيه قدر مقدور<br />الحدادين نافخين معاى الكور<br />والخبازين قايدين معاى الفرن<br />أخبز لكل الناس عشا وفطور<br />والفلاحين ماليين معاى الجرن<br />داقين فى قلبى السبع والعصفور<br />منورين المونه والمعجنه<br />كاتبين لى أيام الزمن والسنه<br />نسمه بنفسهم جايه متلحنه<br />وسؤال فى ودنى زى نبض النور<br />يا مصرى يا سيد وابوك درويش<br />النيل بيجرى والا ما بيجريش<br />النيل بيجرى والعجل بيدور<br />والفجر طالع بالصنايعيه<br />ومصر لازم تبقى مصريه<br />وكل كلمه تقولها أغنيه<br />وكل أمنيه وأمل دستور<br /><br />يا مصر يا مصريه كتر خيرك<br />طالقه على جناح الأمل طيرك<br />يا مصر راضيه و ربنا أعطاها<br />شوقى وبيرم والأديب طه<br />فيه ناس طوت أشجانها جوه الصدور<br />حافظ يناجى فى الخيال والطيف<br />وبين عيونه زى ضربة سيف<br />وفى سكوته آهة المقهور<br />هاتى الآهات اللى ما تتأوهش<br />هاتى الآهات اللى ترج الوحش<br />وفى سجن الاستعمار تهد السور<br />عَلّى رقبتك زى جيش منصور<br />صبى علينا زى شمس الظهر<br />فى الأرض ما تخليش خيال مكسور<br />يا مصر يا أول كتاب العصور<br />أنا ابوس ايديك الشريفه كل ما تولّد<br />سنين ورجاله تحيى الأرض وتخلد<br />أبوس ايديك لتسعتاشر وشيخ سيد<br />يا مصر يا أول كتاب العصور<br />أنا ابوس ايديك الشريفه كل ما تولّد<br />سنين ورجاله تحيى الأرض وتخلد<br />أبوس ايديك لتسعتاشر وشيخ سيد<br />عرب التفت فى هيئة الفنان<br />فى عروته الورده اللى بتفتح<br />قال كان بودى ألحن الجرنان<br />أخبار تجينا الصبح وتفرح<br />عرب اللى دايب من أمل وحنان<br />كل الشوارع تعرفه والدور<br />ألفين سلام مطرح ما عينه تدور<br />مشى فى الجنينه اتقطفت له الزهور<br />قال كلنا نحب الوطن يا ولادى<br />أنا كنت باحلم بالنهاردا الليله دى<br />صبحت بلادى بلادى<br />وانتوا المغنيين وانا الجمهور<br /></strong><br /><br />بلادي بلادي بلادي<br />لكي حبي وفؤادي<br />مصر ياست البلاد أنت غايتي والمراد<br />وعلى كل العباد كم لنيلك من أيادي<br /><br />بلادي بلادي بلادي<br />لكي حبي وفؤادي<br /><br />مصر أنت أغلى درة فوق جبين الدهر غرة<br />يابلادي عيشي حرة واسعدي رغم الأعادي<br />بلادي بلادي بلادي لك حبي وفؤادي<div class="blogger-post-footer"><img width='1' height='1' src='https://blogger.googleusercontent.com/tracker/5457212056480864766-3784865821623958505?l=beladigameela.blogspot.com' alt='' /></div>Abdelsalamhttp://www.blogger.com/profile/06809031281440463853noreply@blogger.com2