نص أمسية بلادى جميلة

- الأستاذ يوسف حلمى ..!
أهلا عمى ..
لأ مش م البيت، أنا باتكلم م الشارع.
حلوه، على رأيك، ما هو بيتنا الشارع ..
كنت فى سهرة وراجع،
قلت اتكلم، واهو من حظى لقيتك،
مع ان – تصور ؟ -
وانا بانقل أرقام التليفون، من نوتة لنوتة،
جيت عندك، قام شىء ملعون قال: لأ ، ما خلاص ..
ومشيت سطرين
والتالت قلت: لا يمكن يوسف حلمى خلاص..
ورجعت كتبت الاسم، ما خلّصنيش،
شوف الاخلاص ..
كانت سهرة جميلة ..
ايوه .. الشله اياها .. تسلم وتعيش ..
كانت وحياة النبى عايزاك ..
غنينا يا سيدى حاجات سيد درويش ..
معلهش .. ما هو انت برضه كنت هناك ..
انت تمللى معانا، وحوالينا، وبيننا،
موت مين ده يابو حجاج اللى يخبيك منا؟!..
يعنى كان خبا الشيخ سيد؟.. ما هو زى الجن،
ولا لحظة بيهمد ولا بيوِّن
فى المسرح، فى المصنع، فى الغيط، فى المدرسة،
فى السجن
ده وتر مشدود يابا،
لمسوه من كام ألف سنة، ولساه بيزن،
وكلام بيرن ،
رنة طويلة طويلة، بتضحك وتئن،
من قلب ربابة النيل على قلبه على قلبك على قلبى
على قلب الشمس الشموسة اللى الليلة قعدت جنبى .
- أيوه. كان فينا الليلة جماعة جداد ..
انضمت فوجه جديده، بنات وولاد.
طبعاً .. زى المعتاد،
صاحيين .. صاحيين .. صاحيين .. صاحيين.
قلنا يا سيدى – فضلة خيرك – "ماتفوقوا يا
مصريين"
و "الحلوة دى قامت" ، و "السيّاس" ..
قلنا "بلادى بلادى" ..
تعرف؟ حسيت احساس ..
ان الشخص البلطجى ده اللى اسمه الموت
عاجز، قدام الناس ..
قلنا "يا هادى يا هادى".
البنت قالت لى: عرفت منين الغنوا دى؟..
قدمتك ليها، وسبتك واقف وياها ..
سبتك واقف بتكلمها، وتعلمها، وترعاها،
ما هو كله كلام …
أنا باتكلم م الشارع ،
والشارع فيه جامع،
والجامع مبنى بقى له ميات م الأعوام
انما شبابيكه كلام ، وبيبانه كلام ،
وعرايس أفريزه كلام ، وحيطانه …
والمعمارجى اللى بناه واقف قدامى، وبيكلمنى،
بيمد لى ايده، و بياخد كبريت منى،
بيولع، وبيضرب لى سلام …
يا سلام ..
موت مين ده يا يوسف حلمى اللى يحوشك عنى؟..
تصبح على خير.


شد الحزام على وسطك غيره ما يفيدك
لابد عن يوم برده ويعدلها سيدك
إن كان شيل الحمول على ظهرك يكيدك
أهون عليك ياحر من مَدّة إيدك

ما تيالله بينا انت وياه ونستعان ع الشقا بالله
واهو اللى فيه القسمه جبناه واللى ما فيش انشالله ما جا
مادام بتلقى عيش وغموس يهمك ايه تفضل موحوس
ما تحط راسك بين الروس لا تقوللي لا خيار ولا فقوس

حقولك ايه واعيد لك ايه كله له آخر
دى خبطة جامدة وجت على عينك ياتاجر
يا وكستك دلوقت لا وارد ولا صادر
يحلها الفين حلال ربك قادر

قل لي في عرض النبي ياحسين رايحين نلاقيها منين ومنين
والاش متجوز اثنين يا دنيا روقي جاتك البين
شوفوا البخيل يفضل موحوس ولو علقوا على بابه فانوس
فلوس دي ايه سكتر يا جاموس هيه السعادة في غنا النفوس

نهايته ياللا بنا والاكسبريس بقى ع الرصيف
وادي حنا بقالنا كام يوم ما عملناش بحق رغيف
كل المحطات قبلي وبحري بقيت "لام اليف"
والسكة انقطعت من دي الهيصة يا لطيف يا لطيف

ما قطعوا لنا التيفونات وعطلوا التلغرافات
عمركش سمعت الدلنجات بيسافروا ليها ببزابورتات
غلب حمار اللى ما له حمار يحملولك ست انفار
واهو السفر في الأيام دي صار على البهايم ليل ونهار

شد الحزام على وسطك غيره ما يفيدك
لابد عن يوم برده ويعدلها سيدك
إن كان شيل الحمول على ظهرك يكيدك
أهون عليك ياحر من مَدّة إيدك

قرب شيلني شيل لا تقولي كتير وقليل
لاتقلي كتير وقليل عمر الشدة ما تطول
عمر الشدة ما تطول عمرك مش زي الأول
هيلا هيلا هيلا هيلا هيلا هيلا هيلا هيلا
هيلا هيلا هيلا هيلا هيلا هيلا هيلا هيصة


رمضان مخلف هلال وهلال مخلف عيد
وكل يوم من ليالينا قديم وجديد
خلف بنيه وصبى خلف أمل وسعيد
وانا طبلتى بتغنى غنوه وتحكى حدوته


أنا عندى يا ولاد الحلال حدّوته أنا والدى هو اللى عاشها. ولا حدّ قبلى نقشها فى حجر ولا مخطوط
كان والدى بالطبع زيى أراجوز ولكن حزاينى وانا كنت واد قطقوط
الخالق الناطق دماغى دما\غه الخالق الناطق كما الشمّوط
كان صوته، الله يرحمه، صفّاره وجسمه رايح جاى زى الفاره وعظمه يا نجارين بيلق فى الزعبوط
و فى يوم من الأيام .. خلى بالك معاى : هنا العقده ، ندهه الملك و كان ملك أعظم من العمده و عيّنه مضحك ولى العهده و قال له
» يا ألعب من القرموط
تضحّك الولد أعلى مراتبك ، تبكّى الولد اقطع رقبتك .. افهم كلامى وامشى بالمضبوط «
والدى ، الله يمسّيه بالخير ، ما كانش ناقصه .. طلّع سلاح أبيضانى و قطع رقبته بنفسه .. راح الولد فى البكا، وانا والدى مات مبسوط
أنا والدى مات مبسوط لأنه عكس أمر الملك أيام ما كان الملك ملك و مصروف الأمل مضغوط
و من ساعتها ، و انا عندى جيوب أنفيه وعينى كما الحنفيه و الدمع منى و فىَّ بحر ماله شطوط ....


كان ياما كان، يحكوا زمان دى الحكاية ..
إن الحمل
– يعنى الخروف الطفل –
وقف فى يوم يشرب من الغدير
- يعنى القناية -
والغابة خضرا والطيور بتغنى من حواليه،
الذئب
– يعنى الديب –
عوى من فوق عليه،
قال له:
يا مخلوق يا حقير
عكرت لى الميه وانا باشرب
لابد من أكلك جزاء لعملتك!
رد الحمل،
قال له:
لكين دى الميه جاية من حداك،
من فوق هناك.
قال له:
ماباتكلمش عن دلوقتى، عامْنَوِّل حصل.
عكرت لى عامنَوِّل المية وأنا باشرب،
لابد من أكلك !
- أنا عمرى ست شهور، وعامنول ما كنتش اتولدت
- عمرك ما عمركش، بلاش كلام ولَتْ،
يبقى أبوك هو اللى عكرها.
أيوه تمام .. هو أبوك.
لا بد من أكلك.
والغابة رنت بالانين والمضغ،
والعشب بات بالدم متحنى
وفى الصباح نزل الندى غسله
والغابة رجعت خضرا، والعصافير بتغنى
ده كان زمان ..
لكن يا حلو الديب لو اتهبل
ليّام دى ، واترازل على الحمل.
لا ح يبقى فيه حملان، ولا ديابه،
معلوم!
ولا حتبقى مدينة ولا غابة،
لكن خرابه،
وحتى ما فيهاش بوم


كان فيه ولد صغير عنده اتناشر سنه
عيل مفعوص وقصير وغاوى فتونه
بيمثل دور فى ذهنه لشخص عظيم الشأن
ويوماتى يحلق دقنه ، مع إنه مالهش دقن
المجنون البعيد بالموس وخلاص ويحرت
لحد ما دقنه كبرت ، قال لك ده اليوم ده عيد
ووقف قدام مرايته يتنطط م الفرح
اكمنه ( حسب روايته ) زى باباه انجرح ..
تع شوفه بقى النهارده، راجل بيه قد الحيط
وصداغه كل فرده ، فيها من القطن غيط ،
يحلف ع النار والميه ، مهو حالق جمعتين ..
ودى قصة فلسفية ، مغزاها ف كلمتين :
شرم برم يا حلوللى، هأو أو ، إش إش ،
ترالاللى أمان يا لالاللى حرنكش ، طظ فش .


كتكوت ومعاه كتكوت تانى وكتكوت تالت
وانى كمانى أربع كتاكيت
إحنا كتاكيت ستّ هديّه
بنصَوْصَوْ صَوّ و نصَوْصَوْ صوّ
م الجهه ديه والجهه ديه
كلّنا سوا سوا وبنملا الجوّ
وتسقف لنا ستّ هديّه
وتعدّ تقول:
كتكوت ومعاه كتكوت تانى وكتكوت تالت
وانى كمانى أربع كتاكيت
إحنا كتاكيت ستّ هديّه
وبنسكُتْ كُتْ وبنتكلّم
وبننكتْ كتْ فى الأرضيّه
وتعدّى علينا وتسلّم
وتسّقف لنا ستّ هديّه
وتعدّ تقول:
كتكوت ومعاه كتكوت تانى وكتكوت تالت
وانى كمانى أربع كتاكيت
إحنا كتاكيت ستّ هديّه
إحنا الكتاكيت الكتكوته
وبنجرى بخطوه مهدّيّه
تاتا تاتا وتوته توته
بتسقف لنا ستّ هديّه
وتعدّ تقول:
كتكوت ومعاه كتكوت تانى وكتكوت تالت
وانى كمانى أربع كتاكيت
إحنا كتاكيت ستّ هديّه


طلعت أدِبّ نزلت أدِبّ
وطالع نازل اقزقز لِبّ
أردبّ أرادِبّ
أرنبْ أرانِبّ
دا كله د اكله فى بطن الدِبّ
وكمثل الدُبّ كمثل الدِبّ
يجُب فى جُب يعبّى فى عِبّ
طلعت أدب نزلت أدبّ

طلعت أدبّ أدبّ دبيب
ونزلت أدبّ سبع سراديب
أنا اخوك الدبّ ماانيش الديب
ومفنجل عينى تقول دا أديب
والاَّ دا عاشق داب فى دباديب
الحلو اللى بيغطس ويقبّ
طلعت أدب نزلت أدبّ

طلعت أدبّ البط ما باضش
نزلت أدب أخوك ما قبضش
أنا باستعبط وما باستعبطش
أنا باتلخبط وما باتلخبطش
أنا صاحب رقّّه وصاحب بطش
تزفّر بقى والاَّ أسبّ
طلعت أدبّ نزلت أدبّ

طلعت أدبّ برجل وإيد
ونزلت أدبّ وعيشه بتقيد
ريّحت رقبتى من التحويد
وعملت صغيّر قلت يا سِيد
إن كانّك مش شايف لبعيد
إعمل زيى على ظفرك شبّ
طلعت أدب نزلت أدبّ

طلعت أدبّ السقف اترجّ
نزلت أدبّ البير اعرَجّ
العالم ماله ؟ العالم وَجّ
قال كلت حبيبك ؟ كلته ياحَاج
ويا حبيبى كان طعمك فجّ
إن كنت حبيب انا برضه مُحبّ
طلعت أدبّ نزلت أدبّ

طلعت أدبّ ولا الأمراء
ونزلت أدبّ يا وز عراق
يا حياتى وموتى ولقا و فراق
و يوماتى بتاكل منى فى راق
آخرتى شماعه فى قصر فراء
ما حاسيبش غير الفرو المجربّ
طلعت أدبّ نزلت أدبّ


كان فيه جَمَل اسمه جَمَلْمَلْ
وفيه حُصَان اسمه حَصَنْصَنْ
مين اللى فيهم كان أجْمَل
مين اللى فيهم كان أحْسَن
محتار أقول

جمل جململ يَتَحَمّلْ
طول السفر لا يَتَمَلْمَلْ
بالطبع كان هوّ الأجمل
أيام زمان شال المَحْمَل
إلى الحجاز

حصان حصنصن فى الميدان
والضرب داير فى المليان
يشبّ ويقبّ بعنتر
بالطبع كان هوّ الأشطر
شوف البطل

جمل جململ لمّا يقوم
يومين بياكل شهر يصوم
من السودان وصل الفيوم
الصبر طيّب

حصان حصنصن كان بيطير
بجناح ملوّن فى الأساطير
والطيّارات زى العصافير
تلعب معاه

جمل جململ ما قالش آه

حصان حصنصن فوق الشطّ
قاس المسافه بنظره ونطّ
بقينا ع الشطّ التانى

جمل جململ شالنى وحطّ
نور القمر فى أحضانى

حصان حصنصن بارسم خطّ
يرقص عليه بالطول والعرض

جمل جململ عَلَى ظَهْره
بالقى السما قريّبه م الأرض

عاوزين تقولوا إيه بالظبط

عاوزين نقول الاِتنين حلوين
الاِتنين يا شيخ أجمل من بعض
الاتنين كمان أحسن من بعض

جمل جململ

وحصان حصنصن

جمل جململ
وحصان حصنصن
وانا وانت !


اوعى يمينك اوعى شمالك
اوعى الأزمة توقف حالك
اوعى وشك اوعى ضهرك
اوعى فوقك اوعى تحتك
اوعى لجيبك م الحرامية
اوعى لروحك م الحانوتية
اوعى الكوكايين يلحس مخك
اوعى م البوكر ليطخك
اوعى م الروماتيزم في رجلك
اوعى الجوزة تطير عقلك
يمينك شمالك اوعى

ياللي ماشية خطوة خطوة
طالعة فيها عاملة حلوة
غطي ايديك غطي رجلك
غطي وشك غطي صدرك
اوعك تترقصي في السكة
اوعك تقوليلي آلا فرانكه
اوعك تتغمزي بعنيكي
والناس ملمومين حواليكي
الراجل لو بصبص ليكي
ايه ذنبه ده الحق عليكي
يمينك شمالك اوعى

وردة وردة وردة وردة
يا فندي حودة حودة
ياللا وسع بلاش زحمة
اسمع اسمع مني كلمة
إن كنت صحيح بدك تخدم
مصر أم الدنيا وتتقدم
لا تقول نصراني ولا مسلم
ولا يهودي ياشيخ اتعلم
اللى اوطانهم تجمعهم
عمر الأديان ما تفرقهم
يمينك شمالك اوعى


مسحراتى
منقراتى
مره فى حياتى
دخلت سيما
شفت اللى آتى
كان ياما كان
حمار حصان
بجوزين حوافر
وجوز ودان
عليه مسافر
شجيع جبان
يشب فوقه
ويحدف بطوقه
ويقل ذوقه
عيان بيان
وحبيبته شقرا
فى إيديها زهره
فى عينيها زغره
ودموع كمان
طب سيبنا من دى
سيبها فى أمان
أدى فى الأمام
أحمر وهندى
داهن دهان
دا هندى هان
أبو عين قويه
بالبندقيّه
هات يا نشان
يقتل له مِيّه
ويمضغ لبان
وبعد غيبته
يرجع بخيبته
يحضن حبيبته
شوف الحنان
ودا علم والا
دا حلم والا
دا فيلم والا
دا شىء جنان
سهرتنا ضاعت
على بضاعةْ
الأمريكان
كان ليه ندوّر
فى غير مكان
إحنا اللى نوّر
فينا الأدان
لازم نطوّر
حواديت زمان
فن الميدان
شعر العروبه
بحر العذوبه
والعنفوان
زى العيدان
نبتت ولادى
فى كل ناحيه
باهتف لتحيا
فنون بلادى


يهون الله يعوض الله ع السقايين
دول شقيانين متعفرتين م الكوبانية
خواجاتها جونا حايطفشونا
ليه بيرازونا دي صنعة أبونا
ما تعبرونا يا خلايق

عملوها فينا طيب رضينا
ما يلزقونا ويشغلونا
و ينفعونا يا خوانا
اشمعنى يعني باولو و يني
ياكلوا الصينية وياخدوا الماهية
م الكوبانية علاولا
وابن البلد دي يطفح الدردي
مايتعدلشي يمكن مايطولشي
يتعشى طرشي يعوض الله
يهون الله ويعوض الله
دا حنا بنسير حسبة بتباشير
وشكوكنا كتير واهيه ماشية

يهون الله يعوض الله ع السقايين
دول شقيانين متعفرتين م الكوبانية
خواجاتها جونا حيطفشونا
ليه بيرازونا دي صنعة أبونا
ما تعبرونا يا خلايق

دي شركة غلسة ميتها نجسة
تلقاها حدقة وخضرة وزرقة
وقال ايه رايقة دي لهجة
إخيه عليها بيحطوا فيها
كربونات ونبيت وسلفات كبريت
وبودرة عفريت هاهاهأه
يابنت ياللي واقفة على البهلي
ما تندهي لي دي ميتي نيلي
إشربي وإدعيلي يعوض الله
روحي الوي بوزك
في وش جوزك
خليه يطير ويجيب لك زير
وانزلي تكسير في الحنفية

يهون الله يعوض الله ع السقايين ...


ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كبار
و ما لكش غير منقار و قادر تعيش
عجبي !

إنشد يا قلبي غنوتك للجمال
و ارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبي !

حدوته عن جعران و عن خنفسه
اتقابلوا حبوا بعض ساعة مسا
و لا قال لهم حد اختشوا عيب حرام
و لا حد قال دي علاقة متدنسة
عجبي !

غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون ... و ليه
رسمت ورده وبيت و قلب و علم
عجبي !

غمض عينيك و ارقص بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ....تقع
عجبي !

ولدي نصحتك لما صوتي اتنبح
ما تخافش من جني و لا من شبح
و ان هب فيك عفريت قتيل إسأله
ما دافعش ليه عن نفسه يوم ما اندبح
عجبي !

يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنما
كتم الغنا هو اللي ح يموتك
عجبي !

الضحك قال يا سم ع التكشير
امشير و طوبه وانا ربيعي بشير
مطرح ما باظهر بانتصر ع العدم
انشالله اكون رسماية بالطباشير
عجبي !

علم اللوع اضخم كتاب في الأرض
بس اللي يغلط فيه يجيبه الأرض
أما الصراحة فأمرها ساهل
لكن لا تجلب مال و لا تصون عرض
عجبي !

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى !!

عينى رأت مولود على كتف أمه
يصرخ تهنن فيه يصرخ تضمه
يصرخ تقول يا بنى ما تنطق كلام
ده اللى ما يتكلمش يا كتر همه
عجبى !!

يا باب أيا مقفول . . إمتى الدخول
صبرت ياما واللى يصبر ينول
دقيت سنين . . والرد يرجع لى : مين ؟
لو كنت عارف مين أنا . . كنت أقول
عجبى !!

أنا كنت شىء وصبحت شىء ثم شىء
شوف ربنا . . قادر على كل شىء
هز الشجر شواشيه ووشوشنى قال :
لابد ما يموت شىء عشان يحيا شىء
عجبى !!

أنا قلبى كورة . . والفراودة أكم
ياما اتنطح وانشاط .. وياما اتعكم
واقول له كل ح ينتهى فى المعاد
يقول بساعتك ؟ والا ساعة الحكم ؟
عجبى !!

بلياتشو قال إيه بس فايدة فنونى ؟
وتلات وقق مساحيق بيلونونى
والطبل والزمامير وكتر الجعير
إذا كان جنون زبونى زاد عن جنونى
عجبى !!

حاسب من الأحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت أحزان من قبلها ؟
عجبى !!

الدنيا من غير الربيع ميته
ورقة شجر ضعفانه مفتفته
لأ يا جدع غلطان تأمل وشوف
زهر الشتا طالع فى عز الشتا
عجبى !!

سرداب فى مستشفى الولاده طويل
صرخات عذاب ورا كل باب وعويل
. . وفى الطريق متزوقين البنات
متزوقين للحب والمواويل
عجبى !!

سهير ليالى وياما لفيت وطفت
وف ليله راجع فى الضلام قمت شفت
الخوف . . كأنه كلب سد الطريق
وكنت عاوز أقتله . . بس خفت
عجبى !!

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!

يا طير يا عالى فى السما طظ فيك
ما تفتكرشى ربنا مصطفيك
برضك بتاكل دود وللطين تعود
تمص فيه يا حلو . . ويمص فيك
عجبى !!

أنا اللى بالأمر المحال اغتوى
شفت القمر نطيت لفوق فى الهوا
طلته ماطلنوش ايه أنا يهمنى
وليه مادام بالنشوى قلبى ارتوى
عجبى !!


طلعت يا محلا نورها شمس الشموسة
يالا بينا نملا ونحلب لبن الجموسة

قاعد ع الساقية يا خلي أسمر وحليوة
عوج الطاقية وقاللي غني لي غنيوة
قلت له يا محمد حبك شقلبلي عقلي
ميتى النار تبرد واعرف راسي من رجلي

طلعت يا محلا نورها شمس الشموسة
يالا بينا نملا ونحلب لبن الجموسة

ندرن علي يا حبي لو يطفى شوقي
لاطبخ ملوخية وادبح جوزين عتاقي
واعمل صينية فيها فطير و رقاقي
ومهلبية واعزم أهلي و رفاقي

طلعت يا محلا نورها شمس الشموسة
يالا بينا نملا ونحلب لبن الجموسة

جاية م الترعة سمعوا رنة خلخالي
لحجوني سبع جدعان طالبين وصالي
ندروني ياخويا وراحوا واقعين في جمالي
قدموا لأبويا مهري ميتين خيّالي


واللى بيعلَى بيعلّى
وقولة القلوب عند بعضها
واصله السما بأرضها
وبنى آدم سلاح نفسه وصاحب رأى
وقبل الناس ما تكتر السنين كانت كتيره
افرش حصيره وخلى البساط أحمدى
الليل بساط يا مصادفنى من آخر السكه
قرب من الناحيه دى
ماليش خيال الا ان رمتنى بنور هادى
ورميت علىّ السلام

فى مره طالع من حسن الاكبر على باب الخلق
بين مغربيه وعشا ، لقيت القمر فى وشى كبير
وقريّب.
تطلع عيونك سلم سطوح بيت:
على حدفة دراع من هنا القلعه ومن هنا العتبه،
والقمر لون الحنان الصيفى والماضى الصغير.
زى اللى خجلان شويه من بهجته وحسنه
وعلى مذهب شارع محمد على الترموايات
قاطعه الخليج بجرس يجرى.
والقمر ميّال لكل الدنيا ، مالى الدنيا.
فوق العباسيه ولبعد الزيتون على نخل.
لبلاد تقول نجع وبلاد تقول كوم. فى نفس
اليوم ، على مزلقان الجيزه و مقبل سارح
غيطان ، واقف على كل محطات السكه الحديد،
واسكندريه.
فى باب الخلق اتملا القرطاس بفول أخضر
رميت علىّ السلام نورت يا ولدى
يجمعنى ايدى وايدها ومعانا ولاد
شبابين
الشوق ما بيسيبش قلبى
الا ساعات على مهل
أنا خدت خطوة صبا
وماشى زى اللى ماتحبش قدمهم رصيف
يا كلّ الناس
كنا قبايل وساحرنا قمر بدوى
ونزلنا زرع وخمايل وحضنا القمر فى الريف


عمرك سافرت الفجر عمرك بكيت
عمرك شقيت من غنوه تسمعها
عمرك لقيت نفسك ومديت لها خطوة صبا
عمرك شكرت أخوك وسقف البيت
وعيون تودك والنظر واللقمه
عمرك خجلت لأن أطيب منك
انت اللى قادر تنفعه
عمرك سألت سؤال
عمرك كتبت لمنكسر مكتوب
ايدك بترعش لما بيملّى
عمرك بدأت عمل وكنت شباب
عمرك سهرت عليه
عمرك جمعت الصبر والحرقه
عمرك خليت تحت الشجر والنور
عمرك طلبت من الريحان دنيا
عمرك مشيت بين الحبايب مغمّض
فى كل خطوه تقول بلادى جميله


مليحة قوى القلل القناوى
رخيصة قوى القلل القناوى
قرب حدانا خدلك قلتين

خسارة قرشك وحياة ولادك
ع اللى ماهواش من طين بلادك
ده ابن بلدك ما يبلفكشى
ما تعدموشى ولا يعدمكشى
دمك من دمه ما يفرقكوا شىء

رخيصة قوى القلل القناوى
قرب حدانا خدلك قلتين

مش بزيادانا بقينا عرة
وكل حاجة من شغل بره
شوفوا الخواجة قلع عينينا
وخلا غيرنا جلس علينا
يادى الفضيحة يادي السخام


انا حُرَّه واموتْ في الحريَّه
ومزاجي أعمل سحليَّه
أزحف على الأرض وع الحيطة
واطلع وانْزل واعمل زيطة
واضرب في الشمسْ طرمبيطه
انا حُرَّه بديلي وبراسي
وما حدشّ يكتم انْفاسي
وما احْطش ماسك لاحْساسي
ولا احْط قزاز
ولا أقفل شيش
عقلي يا هزاز
كلك نغاشيش
وانا حُرَّه أعيشْ
انا عاوزه أعيشْ
انا بدي أعيشْ
انا نفسي أعيشْ
على كيف كيفي

انا حُرَّه وأموتْ في الحريهّ
ومزاجي أعمل سحليه
أرقع في الشمسْ الزغروطه
واخد حمامْ من غير فوطه
انا حُرَّه براسي وبديلي
حُرَّه بنهاري وبليلى
حُرَّه بمناخيري القطقوطه
انا حره بخشمي ماهوش خشمك
وما احْطش برقع ولا يشمك
ولا احْط قزاز
ولا أقفل شيش
عقلي يا هزاز
كلك نغاشيش
وانا حُرَّه أعيشْ ...

انا حُرَّه وأموتْ في الحريهّ
ومزاجي أعمل سحليه
انا أبقي سحليَّه وسيمه
ويجيني برص بتاع سيما
وبتاع مزيكا وتَرا لمْ لمْ
وأتاري في حضنه وانا با حلم
ويقول لي ابتسمي يا بسيمه
وافرحى بالْميه وبالْخضره
ما تحطيش احْمر ولا بورده
ولا احْط قزاز
ولا أقفل شيش
عقلي يا هزاز
كلك نغاشيش
وانا حره أعيشْ ...

انا حُرَّه واموتْ في الحريهّ
ومزاجي أعمل سحليَّه
سحليَّه وحبايبْي سحالي
انا حره بحالي ومحتالي
حُرَّه أصَحصَحْ والا أسخْسخْ
والاَّ أغني وقلبي يشخْشخْ
أبواب الدنيا فاتحه لِي
ما اقعدشي في الأودْه لوحدي
وما احْطش إيدِّي على خدي
ولا احْط قزاز
ولا أقفل شيش
عقلي يا هزاز
كلك نغاشيش
وانا حره أعيشْ ...
انا عاوزه أعيشْ
انا بدي أعيشْ
انا نفسي أعيشْ
على كيف كيفي.


عطشان يا صبايا دلونى على السبيل
فى قلبى ولعه قايده من كتر "السكسابيل"
شكل الصبايا يهبل فى لبس المناطيل
رحت لحكيم يداوى نار القلب العليل
فتح الكتاب وقال لى عندك عقدة خليل
وخليل ده كان عجلاتى فى درب المهابيل
واللى قال الكلام ده أستاذ عالم جليل
اسمه فارويد ولازم نعمل لك تحاليل
يا بهيه وخبرينى ع اللى قتل القتيل
قتلوه السود عيونك واللا الهم التقيل
واحكم يا قاضى المحاكم بالعدل والدليل
قال : اللى جيبه فاضى ممنوع يعشق جميل


وبهيه ، فى المحاكم شدت واحد وكيل
عند البوفيه كان واقف بيشرب جنزبيل
والجنزبيل ده أصله للصوت مالوش مثيل
مكتوب عليه ف مجلد "مرافعات هابيل ،
يشرب منه المحامى ، يمسح أجدع زميل ،
ويفحم النيابه ، ويقصف النخيل . .
وبهية ماشية جنبه فى كوريدور طويل ،
تشرح له ، وهى تبكى، وتبلل مناديل ،
وتقول له : كتير عليا، يقول لها :
قليل،
اتنين ريال يا وليه ، مبلغ تافه ضئيل ،
خدى بالك م الفصاحه، ومن العلم الاصيل ،
والإش لما يحصل ، مفعول الجنزبيل . .
عنها ، ودخل ع القاضى، دخلة أبو زيد تقيل ،
خبط الترابيزه وقال له،
أنا طالب التأجيل


اقرأ يا شيخ قفاعة تلغراف آخر ساعة
اللي في جورنال البورص
وأنا أبقى أحلق ذقني إن ماكنتش ترقص
ترقص ترقص ترقص

الصلح صبح قلسطة والعيشة هتبقى قشطة
ياقساتذة قولم هش
ياقساتذة قولوا براوة الحربُ خلاص فينيشٌ
فينيشٌ فينيشٌ فينيشٌ

بعد أكل التسقية والسلطة والطعمية
اللي بتهد الحيل
نرقع لنا اقتين ثلاثة سمن بلحم الخيل ارقع
ارقع ارقع ارقع

مادام الضاني غالي وكذلك العجالي
مش لازم ندقق
حصانا أو حمارا أو بغلا مش راح نعتق قبدا
قبدا قبدا قبدا

ياما بكرة حنبقى نقلّس ع التجار لما تفلس
وزي مانتفلق
يتفلقوا هما كمان واحنا نضحك هقهق
هقهق هقهق هقهق

يالا نقلوظوا العمة ألا مودا ونستحمى
بصفيحة كالونيا
ونسافر على أوروبا نتفرج ع الدنيا
تيريرم تيريرم تيريرم

نسوانها قلماظية لا تقول لي مهلبية
قبدا قبدا إيش جاب
قربت أسيح قربت أسخسخ قربت أتكهرب الحق
ياسلام على حطة بطة نطة حطة نطتهم
على خفة نتفة خفة نتفة خفة نتفتهن

سيبك م الفقهنة خالص من بكره هتبقى لابس بدل العمة كاسكيت
فوزافي آلف بي تي كسكيليا علي يا بتاع الزيت
روميو وجولييت في البيت

قرشت مرشت قرشت مرشت
فرشت وقالتلي اقعد
عكشت نكشت قرشت مرشت
يا حلاوتها فري جود


يوم الخميس،
واللب، والأحلام، فى كيس
طرزان بيغطس فى الهويس.
طرزان جدع،
طرزان شديد،
دراعه أجمد م الحديد.
قزقزت نص اللب، هاه ..
طرزان بيصرخ:
عا عا عاه ..
خنق الأسد،
طحن الدماغ، عجن الجسد ..
قرقشت باقى اللب، من غير قزقزه،
طرزان صرخ قال:
عاعاعاه..
صرخت أنا كمان وراه.
ولما قال لشيتا: يا امه زغرطى ..
وحط رجله ع التعيس، فوق التراب،
حطيت معاه رجلى ، بدون جزمة وشراب،
ورسمت بعيون الخيال، بدل الأسد،
محمود أفندى حسين .. مدرس الحساب!


الشارع قال للحارة :
إخييه ..
ريحتك طعميه ، وفول وبصارة ..
آييياه ..
كل بيوتك بغدادلى
مافيهاش تكييف
وبيبانك نازله لتحت، بدال ماهى طالعه لفوق،
ولا حتى ليكى رصيف ،
ستاتك بلدى ، وليل ونهار ع العتبه
قاعدين كده جوق ..
رجالتك نكته وعجبه ،
ولا يعرفو ذوق ،
وعيالك دول ،
نسانيس مقاصيف الرقبه ،
الحاره ردت رد ..
خللى الشارع ينسد !


كلامى فى واحد دكتور
بعت لعيلته تلات اسطر
.. أطيب تحيه و أما بعد
انا ابنكم : الدكتور سعد
ورا الستاره أخدت لى دُش
نشفت جسمي بالبشكير
قعدت قعده فى ركن العُش
قررت من بعد التفكير
ما ارجعش تانى للدبان
و أعيش هنا فى ظل سوبرمان
و بلغوا اختى بهانه
سلام مراتى سوبرمانه
على فكره اسمى بتنطقه سد
ما فيش لزوم أتلقى الرد

– يا دمك الشهد بيقطر
بعت لعيلته تلات اسطر

رديت عليه بالمستعجل
على شريط فنى مسجل
على الأثير صوتى يجلجل
خساره فيك التربيه
شقا الإيدين الفلاحه
خساره شغل الترزيه
فى بدلتك يا متقيف
اخدت دش و متليف
قعدت قعده بالراحه
عندك شتا و الا مصيّف
بقى البلاد السفاحه
خدودها زى التفاحه
بقى انت عاوز تتكيف
بقى انت مش قادر تصبر
بعت لعيلته تلات اسطر

يا أيها الولد المبعوث
يا خايب الرجا يا متعوس
من حق تغوى بلاد بره
و من بلادك تتبرا
عشان هنا عندنا دبان
و عندنا جبهه و ميدان
و عندنا اشتراكيه كمان
خايف لنكشف بالمجان
خايف تناوب فى مبره
على يمين شق التعبان
خايف لتيجى تروح محدوف
وحدك فى وحده فى نجع شادوف
وسط الكفور المغبره
ما بين قنا و ما بين الاقصر
بعت لعيلته تلات اسطر

سلام ما يوصلكش سلام
من الحمام فى أبراجه
يا غاوى راحه و استجمام
لازم هناك أهل شيكاجو
العصبجيه بيحتاجوا
لطب سعد و لعلاجه
ريل على عظم دولارهم
إلهى تتهنى بنارهم
نينتك هنا يا سعد سعود
ابوك شرح لها افكارهم
وصف لها جنة هوليود
حكى لها عن تمييز السود
يا اللى انت أبيض مش مولود
قعدت تقول ربنا يستر
بعت لعيلته تلات اسطر


سالمة يا سلامة آه يا سالمة يا سلامة
سالمة يا سلامة رحنا وجينا بالسلامة
صفر يا وابور واربط عندك نزلنى فى البلد دى بلا أميركا بلا أوربا مافى شئ أحسن من بلدى
دى المركب اللى بتجيب احسن من اللى بتودى يا اسطى بشندى
ويا سالمة يا سلامة

سلطة ما سلطة أهو كله مكسب حوشنا المال وجينا
شفنا الحرب وشفتا الضرب وشفنا الديناميت بعنينا ربك واحد عمرك واحد ادى احنا اهه رحنا وجينا
ايه خس علينا
يا سالمة يا سلامة

صلاة النيى ع الشخص منا قرطة ميه بلا قافية
اللى ف جيبه يفنجر به والبركة فى العين والعافية
ح تاخد ايه م الدنيا غير الستر يا شيخ خليها ماشية دنيا فانية
سالمة يا سلامة

دى الغربة ياما بتورى بتخلى الصنايعى بيرطن
مطرح ما يروح المصرى برضه طول عمره ذو تفنن
وحياة ربنا المعبود وى آر فرى جود ياسطى محمود قدها وقدود
سالمة ياسلامة


النخل فى العالى والنيل ماشى طوالى
معكوسه فيه الصور .. مقلوبه وانا مالى
يا ولاد انا ف حالى زى النقش فى العواميد
زىّ الهلال اللى فوق مادنه بنوها عبيد
و زىّ باقى العبيد باجرى على عيالى
باجرى و خطوى وئيد من تقل أحمالى
محنيه قامتى .. و هامتى كأن فيها حديد
و عينيا رمل العريش فيها و ملح رشيد
لكنى بافتحها زى اللى اتولدت جديد
على إسم مصر

مصر .. التلات أحرف الساكنه اللى شاحنه ضجيج
زوم الهوا و طقش موج البحر لمّا يهيج
وعجيج حوافر خيول بتجر زغروطه
حزمة نغم صعب داخله مسامعى مقروطه
فى مسامى مضغوطه مع دمّى لها تعاريج
ترع و قنوات سقت من جسمى كل نسيج
و جميع خيوط النسيج على نبره مربوطه
أسمعها مهموسه والاّ اسمعها مشخوطه
شبكة رادار قلبى جوّه ضلوعى مظبوطه
على إسم مصر

على إسم مصر التاريخ يقدر يقول ما شاء
أنا مصر عندى أحب و أجمل الأشياء
باحبها و هىَّ مالكه الأرض شرق و غرب
و باحبها و هىَّ مرميه جريحة حرب
باحبها بعنف و برقه وعلى استحياء
واكرهها والعن أبوها بعشق زىّ الداء
واسيبها و اطفش فى درب و تبقى هىّ ف درب
و تلتفت تلتقينى جنبها فى الكرب
والنبض ينفض عروقى بألف نغمه و ضرب
على إسم مصر

مصر النسيم فى الليالى و بيّاعين الفل
و مرايه بهتانه ع القهوه .. أزورها .. و اطلّ
ألقى النديم طلّ من مطرح ما انا طَلّيت
والقاها برواز معلّق عندنا فى البيت
فيه القمر مصطفى كامل حبيب الكل
المصرى باشا بشواربه اللى ما عرفوا الذل
و مصر فوق فى الفرانده واسمها جولييت
ولما جيت بعد روميو بربع قرن بكيت
و مسحت دمعى فى كمى ومن ساعتها وعيت
على إسم مصر

مصر السما الفزدقى وعصافير معديّه
والقله ممليّه ع الشباك .. منديّه
والجد قاعد مربّع يقرا فى الجرنال
الكاتب المصرى ذاته مندمج فى مقال
و مصر قدامه اكتر كلمه مقريه
قريتها من قبل ما اكتب اسمى بإيديا
و رسمتها فى الخيال على أبدع الأشكال
و نزلت أيام صبايا طفت كل مجال
زىّ المنادى و فؤادى يرتجف بجلال
على إسم مصر

قوم يامصري مصر دايما بتناديك
خد بنصري نصري دين واجب عليك
يوم ماسعدي راح هدر قدام عنيك
عيد لي مجدي اللي ضيعته بإيديك
شوف جدودك في قبورهم ليل نهار
من جمودك كل عضمة بتستجار
صون آثارك ياللي دنست الأثار
دول فاتولك مجد وانت فت عار

شفت أي بلاد يامصري في الجمال
تيجي زي بلادك اللي ترابها مال
نيلها جاي السعد منه حلال زلال
كل حي يفوز برزقه عيشته عال
يوم مبارك تم لك فيه السعود
حب جارك قبل ما تحب الوجود
ايه نصارى ومسلمين قال ايه ويهود
دي العبارة نسل واحد م الجدود

ليه يامصري كل احوالك عجب
تشكي فقرك وانت ماشي فوق دهب
مصر جنة طول ما فيها انت يا نيل
عمر ابنك لم يعيش ابدا ذليل
يوم مبارك تم لك فيه السعود
حب جارك قبل ما تحب الوجود
ايه نصارى ومسلمين قال ايه ويهود
دي العبارة نسل واحد م الجدود


النور ملو الشوارع ،
ومليون راديو والع ،
الساعة اتنين صباحا ،
لكين إيه الموانع !
.. الخلق رايحه جايه ،
والدنيا لسه حيه ،
مليانه بالهأو أو ،
و زعيق القهوجية .
. . واحد يقول لواحد :
خليك يا عم قاعد ،
التانى يقول له : شكرا ،
ده انا م المغرب مواعد ،
فيه سهره لسه عندى ،
فى بيت فلان افندى ،
ح ناكل حاجة حلوه ،
ونشرب تمر هندى ..
واللى تروح دالقه جردل ،
فوق حضرة المبجل ،
طبعا صاحبنا يزعل ،
وينفجر شتايم …
والحى كله يوصل ،
ما بين مصلح و لايم ،
اللى يقول :
يا جماعة …
واللى يقول : يا بهايم ..
ومطرب الاذاعة ،
يصرخ ، وف وجده هايم ..
ولو طرطقت ودنك ،
فى وسط دى العظايم ،
تسمع مسحراتى ،
بطبله صوتها واطى ،
بيقول :
اصحى يا نايم


اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم

مسحراتى
منقراتى
خالاتى عماتى سيداتى
على تل عجوه وعسل وسمن
ولا مجلس الأمن سهرانين
لت وعجين
يبنوا الهرم
قالت حماة المحترم
يا كعك يا سيد الكرم
نبطلك فى المشمشى

يا بنت قومى وفرفشى
لا تحوشى
ولا تختشى
احمى الوابور واستحمشى
إشى وإشى
تلاقيه مشى
إشى نغبشى
واشى حبشى
واشى دندشى
واشى انقشى
واشى ينحشى
واشى رشرشى
سكر عليه
بركة ايديه
فرحة عينيه
قال ايه وايه
المشى طاب له
والدق على طبله
ناس كانوا قبله
قالوا فى الأمثال:
"الرجل تدب مطرح ماتحب"


المشى طاب لى

والدق على طبلى
ناس كانوا قبلى
قالوا فى الأمثال:
"الرجل تدب مطرح ماتحب"
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:

رمضان مخلف هلال وهلال مخلف عيد
وكل يوم من ليالينا قديم وجديد
خلف بنيه وصبى خلف أمل وسعيد
وأنا طبلتى تغنى غنوه وتحكى حدوته
بالسمن ملتوته
ونرجع نقول ونعيد
رمضان مخلف هلال وهلال مخلف عيد


هز الهلال يا سيد كراماتك لاجل نعيد
يكفي اللي حصل كام يوم ووصل بقى زرع بصل
هديت واهو راق الحال ورجعنا للأشغال
دا الموظف منا مش وش خناق ولا شومه
لما يحمر عينه والا يقوّم له قومه
حد الله ما بيني وبينك غير حب الوطن ياحكومة

عشرين يوم راحو علينا إن شا الله ياخدوا عنينا
بس المقصود يبقى لنا وجود والدنيا تعود
ياما شفنا م الستات طلعوا وعملوا مظهرات
والكناسين رخرين راسهم والف مقشة
ما يكنسوا بس كنسه ولا يرشوا رشة
والصنايعية راحم جايبين ضلفة أحسن ورشة

الغلب اللي شاربينه يا ريت العالم شايفينه
دي ماهية ايه الكام جنيه يا خواتي بريه
من خمسة منه تروح وبقيته أقول ابوح
وبسلامتها الست بتاعتي ما تتوصاشي
ولاتولدليش في البطن إلا اتنين كده ع الماشي
وييجي الجزار والخضري والبقال يلعنوا ابو خاشي

هز الهلال يا سيد كراماتك لاجل نعيد
يكفي اللي حصل كام يوم ووصل بقى زرع بصل
هديت واهو راق الحال ورجعنا للأشغال
دا الموظف منا مش وش خناق ولا شومه
لما يحمر عينه والا يقوّم له قومه
حد الله مابيني وبينك غير حب الوطن ياحكومة


ليه يا عرب تستبدل القفطان
عرب التفت على مهله واتبسّم
يا سنته نوارة الأوطان
خلى الكلام يحلى ويتقسم
يا سامعين أبناء بلد واحده
تحت السما الواحده عرب بيقول:
أيام تسعتاشر بتحيى الحى
و تخلى فنان البلد مسئول
يا سامعين يا اهل الزمان الجاى
ليلكم منور فى العزب والقرى
كان ياما كان من مبدأ الذاكره
الشمس طالعه وصوتى مش سامعاه
حرمت أغنى لها وانا فى الدرا
فتحت شباكى وقلبى معاه
وجبت ريح البحر للقاهره
وطلقت حنجرة الفتاه والشاب
ورفعت فنى الى مقام الشعب
فنى رجع للأصل بالطفره
رجعت لى مصر بقوة الثوره
الثوره ضاربه فى صميمى جدور
أغنيه أمنيه قدر مقدور
الحدادين نافخين معاى الكور
والخبازين قايدين معاى الفرن
أخبز لكل الناس عشا وفطور
والفلاحين ماليين معاى الجرن
داقين فى قلبى السبع والعصفور
منورين المونه والمعجنه
كاتبين لى أيام الزمن والسنه
نسمه بنفسهم جايه متلحنه
وسؤال فى ودنى زى نبض النور
يا مصرى يا سيد وابوك درويش
النيل بيجرى والا ما بيجريش
النيل بيجرى والعجل بيدور
والفجر طالع بالصنايعيه
ومصر لازم تبقى مصريه
وكل كلمه تقولها أغنيه
وكل أمنيه وأمل دستور

يا مصر يا مصريه كتر خيرك
طالقه على جناح الأمل طيرك
يا مصر راضيه و ربنا أعطاها
شوقى وبيرم والأديب طه
فيه ناس طوت أشجانها جوه الصدور
حافظ يناجى فى الخيال والطيف
وبين عيونه زى ضربة سيف
وفى سكوته آهة المقهور
هاتى الآهات اللى ما تتأوهش
هاتى الآهات اللى ترج الوحش
وفى سجن الاستعمار تهد السور
عَلّى رقبتك زى جيش منصور
صبى علينا زى شمس الظهر
فى الأرض ما تخليش خيال مكسور
يا مصر يا أول كتاب العصور
أنا ابوس ايديك الشريفه كل ما تولّد
سنين ورجاله تحيى الأرض وتخلد
أبوس ايديك لتسعتاشر وشيخ سيد
يا مصر يا أول كتاب العصور
أنا ابوس ايديك الشريفه كل ما تولّد
سنين ورجاله تحيى الأرض وتخلد
أبوس ايديك لتسعتاشر وشيخ سيد
عرب التفت فى هيئة الفنان
فى عروته الورده اللى بتفتح
قال كان بودى ألحن الجرنان
أخبار تجينا الصبح وتفرح
عرب اللى دايب من أمل وحنان
كل الشوارع تعرفه والدور
ألفين سلام مطرح ما عينه تدور
مشى فى الجنينه اتقطفت له الزهور
قال كلنا نحب الوطن يا ولادى
أنا كنت باحلم بالنهاردا الليله دى
صبحت بلادى بلادى
وانتوا المغنيين وانا الجمهور


بلادي بلادي بلادي
لكي حبي وفؤادي
مصر ياست البلاد أنت غايتي والمراد
وعلى كل العباد كم لنيلك من أيادي

بلادي بلادي بلادي
لكي حبي وفؤادي

مصر أنت أغلى درة فوق جبين الدهر غرة
يابلادي عيشي حرة واسعدي رغم الأعادي
بلادي بلادي بلادي لك حبي وفؤادي